Hnamdangin Mizo an khawih rawn Chuhvel khaw mi pakhat a thi

October 28, Ningani zan khan Mamit district-a Kolalian aṭanga km. 3 vela hla Assam mite'n an luah chin ramah hnam dangin Mizo pali an khawih rawn a, Chuhvel pa pakhat a thih bakah mi dang an hliam.

Chuhvel Branch YMA vice president Lalrinchhana hnen aṭanga thu dawn danin, Chuhvel khaw mi pahnih leh Bâwngva khaw mi pahnihte chu hnam dang (vai)-te nen bâwng lei tur in an inbe rem a, a hma pawhin bâwng an lo inleisak tawh a ni.

Vai ho chuan bawng chu a kal ṭha duh lo nia sawiin, anmahni pui turin bawng leitu tur Mizote chu an ngen a, mi palite chu zan dar 10 velah Chuhvel aṭangin an chhuak a ni. Mizote hian bawng leina tur Rs 1,50,000 an keng nghal bawk.

Mizo palite chu bawng an leina turte nen chuan an inhmu a, mahse, vai ho chuan hriamhrei hmangin an lo bei nghal a, Mizote pawhin bei let ve mah se, hriamhrei an neih ve loh avangin an tlanchhia a; vai ho chuan an hriamhrei hmanga kut an thlak hman bakah, an tlanchhia chu an kâp zui a, silai vawi hnih a puak a ni.

Vai ho hian bawng leina tur pawisa zinga Rs 1,00,000 chu an chhuhsak a, mobile phone pahnih leh driving license an laksak a, Rs 50,000 erawh chu motor-ah an dah avangin an la tel lo thung.

Chuhvel khaw mi pakhat zawk, Lalfakawma (26) s/o Hunlawmawma chu a thi a, mi dangte pawh an hliam bakah, Bawngva khaw mi pakhat zawk phei chu a ngaihtuahawm hle niin Lalrinchhana chuan a sawi.

Lalfakawma ruang hi nimin khan Kawrthah damdawi-inah postmortem a nih hnuah nimin vek khan vui a ni a; Bawngva khaw mi hliam na zawk chu Kawrthah damdawi-in aṭangin Mamit District Hospital-ah thawn a ni a, District Hospital hian Aizawl lamah an thawn chhâwng leh bawk.

Thil thleng chungchangah hian Kawrthah Police Station-ah FIR thehluh a ni.