Biala hna thawhte a ṭhat leh ṭhat loh Kan zavaia mawh a ni - Lalduhoma

ZPM Legislature Party (ZLP) leader Lalduhoma chuan nimin khan a bial chhunga Thenzawl Bazar Branch YMA silver jubilee lungphûm a hawng a, HSLC & HSSLC-a zirlai ti ṭhate chawimawina a hmanpui nghal a; bial chhunga hna thawhte a ṭhat leh ṭhat loh chu an zavaia mawh a nih thu a sawi.

Lalduhoma chuan, Serchhip bial mipui zarah MLA a ni leh ta tih sawiin, "Kan bialah hian eng hna pawh thawk ila, a chhawrtu chu keimahni tho kan nih avangin a ṭhat leh ṭhat loh thuah te, enkawl chungchang thlengin kan kutah a awm a ni tih kan hriat a pawimawh," a ti.

ZLP Leader chuan, YMA chu kohhran din liau liau a nih thu sawiin, "YMA-ah chuan páwl ram a awm lo a, khawtlang leh ramin chhiat ṭhat a tawh pawhin an tel loin kan awm thei lo a ni," a ti a; Thenzawlah pawh YMA chu inrêlbàwlnaah a kûngpui an nih thu sawiin, Thenzawl Bazar Branch YMA-in silver jubilee a thleng chu a lawmpui thu a sawi.

HSLC leh HSSLC-a zirlai ti ṭhate fuihna leh lawmpuina thu sawiin Duhoma chuan, tuna zirlaite chu an vannei a, zirna ṭha leh changtlung tak a awm tawh avangin hlawhtlinna chu an kuta innghat liau liau a nih thu a sawi a, "Zirnaah moral subject telh hi thil pawimawh tak a ni a, ṭhangtharte zingah aia upa zah nachang hre mang lo tam tak an awm tawh a ni," a ti.

Lalduhoma chuan, work culture thlâk a ngai tih sawiin, "Chuktuah huan aṭanga chawhmeha intodelh dan te, electric siam te, plumbing leh heti lam general knowledge hi kan inzirtir tam a ngai," a ti a; India rama handloom district thlan zingah Thenzawl a tel chu lawmawm a tih thu sawiin, "Eizawnna atana bul ṭan duh tan bul kan ṭansak dawn a ni. A hmanrua leh design-te pein a lei duh turte'n an duh ang ngei an lei thei tawh dawn a, market awm sain bul kan ṭansak thei dawn a ni," a ti bawk.