Damdawi man chungchang zirho

Mizoram Price Monitoring and Resource Unit Society (PMRU) leh Food and Drugs Administration (FDA) chuan nimin khan Aizawlah 'Seminar on Availability of Essential Medicines' an huaihawt a; khuallian R Lalramnghaka, Health secretary-in NPPA-in pamphlet an rawn thawnte a tlangzarh.

Health Services joint director (FDA) Lalsawma chuan Mizorama PMRU din ṭan dan sawiin, Mizoramah October 2020 aṭangin an thawk ṭan tih a sawi a; India ram state 15-ah PMRU hawn a ni tawh a, Mizorama PMRU-ah thawktu pathum an awm mek thu a sawi bawk.

Seminar-ah hian Mizoram Chemist Druggist Association, Mizoram Consumer Union, RIPANS leh Laithangpuii College of Pharmacy-a pharmacy lecturer te, Mizoram State Pharmacy Council leh Drug Regulators Aizawla awmte an tel a ni.

Mizoram PMRU chuan, damdawite chu a man bithliah aia sanga hralh a nih loh nana hmalak leh chumi bawhchhetute hrem an nih theih nan leh ram chhunga damdawi mamawh chi kim a awm theih nana hmalak a tum a; damdawi rate dik chungchanga zirtirna pek tum a ni bawk.

Damdawi man chungchanga zualko duhte tan phone number 8974728576, email mizorampmru@gmail.com leh Health Services directorate-ah thlen theih a nih thu an tarlang.