Ram rorelnaah Pathian ram din kan tum - ZPM President

ZPM party chuan nimin khan an pisaah an party zawm tharte lawm luh inkhawm an buatsaih a; an president Lalliansawta chuan, ZPM chuan ram rorelnaah Pathian ram din an tum thu a sawi.

ZPM consultant W Chhuanawma kaihhruai inkhawmah Lalliansawta chuan, "ZPM hi hmasawnna nasa tak nen a kal zel a, Zoram mipuiin rinna an nghat thar zel. Chutihrualin, tun hnaiah ZPM han chhuahsan zawkte pawh an awm ve a, pawi ka ti tak zet. Kan kal lohnaahte pawh rawn inpe thar leh lawm luh tur an awm ruih ruih reng a, kum 2023-ah chuan Pathian chakna ringin kan sorkar ngei ang," a ti.

ZPM President chuan, Mizoram siamṭhat tumin ZPM chu kalphung thar nen an kal mek zel tih sawiin, "Hetih lai hian a bawl lai awm palh awm ve thei a ni. Hengte hi a pawi ṭhin a, hnual phah nan erawh hmang loin, insiamṭhat nan leh min tichak thartuah hmang zel ila. Ram rorelnaa Pathian ram din hi kan party chuan a tum ber zinga mi a ni," a ti a; an thil tum tihhlawhtlinpuiah Mizo mipui a sáwm.

ZPM thuchhuah chuan, an party zawm thar an lawm luh zingah Power & Electricity engineer-in-chief hlui C Lianlunga leh FCSCA deputy director hlui R Sanghnuna te an tel tih a tarlang.