MNF sorkarin eirûkna khurpuiah MGNREGS a siam - Mizoram BJP

BJP, Mizoram Pradesh chuan, MGNREGS (ni 100 inhlawhna) material component chu MNF sorkarin eirûkna khurpuiah a siam tih an tarlang a; MGNREGS chu rang taka MGNREGS Act anga kalpui nghal turin MNF sorkar an chah.

Mizoram BJP chuan thuchhuah siamin, kum khat chhunga thingtlang mite ni 100 inhlawhna tur pawisa wage component chu a vaiin sorkar laipuiin a tum a nih thu leh chuta ṭanga 40% chu material component a nih thu an tarlang a, "Thingtlang mite dâwm kânna tur, khawpui area páwn lam tan a ni tih CM Pu Zoramthanga kaihhruai MNF sorkar hian hria a, rang taka MGNREGS Act anga kalpui nghal turin MNF sorkar kan hriattir a ni," an ti.

BJP tarlan danin, RTI Act hmanga MGNREGS kalpui dana information an neihah, Mizoram sorkarin Gazette noti­fication chhuahin, state level-ah State Employment Guarantee Council, district level-ah District Employment Council, block level-ah Block Employment Council leh village level-ah Village Employment Council (VEC) siam a ni a; VEC tih loh chu a taka din leh kalpuina a awm lo.

Sorkar laipuiin MGNREGS sum a pek aṭanga material compoment chu MNF party worker-te duhsak nan a nih thu sawiin BJP chuan, "MNF ministry hian MGNREGS inkaihhruaina dan pawngsualin, eirûkna khurpuiah a siam chho ta hi a pawi kan ti hle," an ti.

Mizoram BJP chuan, Aizawla MNF worker-te hnenah thingtlang khaw tam taka MGNREGS hnuaia hna pek an ni tih sawiin, "MGNREGS rim taka buaipuitu VC/VEC leh thingtlang mipui chanpual chhuhsakna a nih avangin thingtlang mite rahbehna lian tak a ni," an ti a; DRDA office leh BDO office-te hminga contract hna siama MGNREGS kalpui a nih dan chu sorkar laipuiah an thlen dawn tih an tarlang bawk.