MIPSA-in national seminar buatsaih

Mizoram Political Science Association (MIPSA) chuan nimin khan Aizawl North College-ah 'Political Economy of Development in Mizoram' tih thupui hmangin national seminar an buatsaih a, Home minister Lalchamliana'n a hmanpui.

Home Minister chuan, sorkar inrêlbàwlnaah Mizoram chu kum 34 state puitling a nih tawh thu a sawi a, "Hetih chhung hian political economy-ah kan la puitling lo hle. Sorkarna fawng vuantute'n mipui hamṭhatna tur hrang hrang an duang ṭhin a, harsatna hrang hrang avangin a duangtute duh angin a hlawhtling ṭhin lo," a ti.

Incheina, lirthei, gadget leh thil dangah Mizote an changkan thu sawiin Lalchamliana chuan, "Intodelhna kawngah kan hnufûm si hi kan inenfiah a ngai a, kan ngaihsan zawng leh value system a dik a pawimawh," a ti a; value system chhe mek siamṭha turin zirtirtute an pawimawh thu a sawi.

Seminar-ah hian thupui chi hrang hrang zirho a nih bakah, MIPSA hruaitu an thlang a ni. MIPSA hi February 16, 2004-ah din a ni a, live member 82 an awm mek a ni.