State 29 zinga capital expenditure hmang tlem ber dawttu - Mizoram

India rama state 29 zingah Mizoram chu hmasawnna leh ram ruhrel siamna (capital expenditure) atana sum hman kawngah tun hnai kum 9 chhunga sum hmang tlem ber dawttu a ni a, Mizoram aia hmang tlem chu Sikkim a ni.

Reserve Bank of India (RBI)-in tun hnaia 'Handbook of Statistics on Indian States' a tih­chhuaha a lan danin, Mizoram hian kum 2008-09 aṭanga 2016-17 chhungin capital expenditure atan cheng vbc. 8470 a hmang. Mizoram aia hmang tlem awm chhun Sikkim chuan kum 2008-09 aṭanga 2016-17 chhung hian cheng vbc. 81.5 an hmang thung.

India rama state 29-te chu special category leh non-special category-ah ṭhen a ni a, Mizo­ram chu state dang 10-te nen special category-ah an awm. Special category-ah hian hmarchhak state-te bakah, Himachal Pradesh, Jammu & Kashmir leh Uttarakhand-te an awm a ni.

Mizoramin capital expenditure atana sum a hman dan chu - kum 2008-09 ah cheng vbc. 550, kum 2009-10 ah vbc. 830, kum 2010-11 ah vbc. 740, kum 2011-12 ah vbc. 760, kum 2012-13 ah vbc. 830, kum 2013-14 ah vbc. 720, kum 2014-15 ah vbc. 1050, kum 2015-16-ah vbc. 1340 (revised estimate) leh, kum 2016-17 ah vbc. 1650.9 (budget estimate) a ni.

India ram state 29 zinga capital expenditure atana kum 2008-09 aṭanga 2016-17 chhunga sum hmang hnem ber chu Uttar Pradesh a ni a, cheng vbc. 4,41,490 an hmang a; pahnihna Maharashtra chuan cheng vbc. 2,64,670 an hmang.