Lungleiah NCC battalion din dawn

National Cadet Corps (NCC) State Level Advi­sory Committee chu nimin khan Sport & Youth Services minister Zodintluanga hoin a pisaah an ṭhukhawm a; Lungleiah NCC batallion din a nih dawn thu leh a dinna tur sum hmuh a nih tawh thu tarlan a ni.

Meeting-a tarlan dan­in, Lungleia NCC ba­ta­llion dinna atan Ministry of Defence aṭang­in sum hmuh a ni tawh a, Lung­leia awm tur junior commissioned offcer pali leh non-commissioned offcer pariatte chu 1st. Mizo Bn., Aizawlah attach-in an awm tawh. Mizoram sorkar chuan NCC batallion thar awmna tur building bakah, civil staff mi 26 leh inenkawlna tur sum ṭhenkhat a tum dawn.

Ministry of Defence chuan Lungleiah hian army officer pahnih, JCO pariat leh NCO 18 dah a remti a; Siaha, Lawngtlai leh Serchhip a enkawl tel ang.

Tuirial Airfield-a NCC Academy din tur bawhzui mek a ni bawk. Cadastral survey neih niin, tun dinhmunah a rang lama NCC Academy luah a nih theih nan Airfield-a a zawl chin, tarmac leh a chhehvel chu NCC-te hnenah luah phalna pek phawt ni se, tih a ni a; a bak ram mamawh dangte chu danin a phalsak ang zela pek leh tur a ni.