World No Tobacco Day hman a ni

Nimin khan World No Tobacco Day a ni a, Mizoram hmun hrang hrangah hman a ni. Aizawlah chuan Lal Thanhawla Auditorium-ah National Tobacco Control Prog­ramme (NTCP), Indian Society on Tobacco & Health (Mizoram Chapter) leh National Service Scheme (NSS) huaihawta hman a ni a, School Education minister H Rohluna'n a hmanpui.

Minister H Rohluna chuan, vaihlo dotu pawl hrang hrangte hmalakna avangin tunah chuan Mizoramah puipunna leh vantlang hmunahte zûk leh hmuam ti lai hmuh tur a tlem sâwt hle tih a sawi a; zirlai naupangte chu zûk leh hmuamin an nih tur ang a nihtir lo thei a ni tih hria a, ti lo turin a fuih.

H Rohluna chuan, sorkarin zûk leh hmuam do kawngah hma a la mek zel tih a sawi a; Aizawl New Market-a vaihlo leh a kaihhnawih zuarte pawh an ṭhutna lai a ualau avangin hmun biru zawkah insawn tura ngenna lehkha pek an nih thu te, thuawih taka an insawn thuai a beisei thute a sawi bawk.

ISTH (Mizoram) president Lal Riliani chuan, May 11, 1989 aṭanga zûk leh hmuam titlem tura châwl lo leh beidawng loa an hmalaknain rah duhawm tak a nei zel tih sawiin, "Mizote chu Kristian kan nih angin, kan thlarau nun nen pawhin kan taksa leh kan lan dan kan tihthianghlim hi a inmil tlat a ni," a ti.

National Tobacco Control Programme state nodal officer Dr Jane R Ralte chuan, vaihlo zûk leh hmuam chungchanga Mizoram dinhmun a sawi a; kum 2016-2018 chhungin vaihlo leh kaihhnawih thil an man leh tihral zat chu Rs. 50,28,790 hû a nih thu a tarlang.

Dr Jane R Ralte tarlan danin, Global Adult Tobacco Survey (GATS)-in zirchianna a neihah kum 2009-10 khan vaihlo zûk leh hmuamah Mizoram chu a sang ber (67%) a, GATS 2016-17-ah erawh chuan MIzoram dinhmunin hma a sawn a, Tripura a sáng ber tawh thung. GATS 2016-17 ah hian Mizoram chu vaihlo ti tam lamah pahnihna (59%) a ni. Khawvel pumah kum tin vaihlo leh kaihhnawih vangin mi nuai 10 vel an thi ziah anga chhût a ni.

World No Tobacco Day hman­naah hian zirlai ṭhahnem tak an tel a; kumina Day thupui chu ‘Tobacco and heart disease’ (Vaihlo leh lung natna) tih a ni a, thupui hi clinical cardiologist Dr Mary C Lalnuntluangi'n a sawifiah.