IELTS exam centre neih dan tur ruahman

Mizoram Youth Commission (MYC) chairman Joseph Lalhimpuia leh Exams Bussiness Development, British Council, East India general manager Raj Tiwari te chu nimin khan an inkâwm a; India ram páwna lehkha zir chhunzawm tumte'n an paltlang ṭhin, International English Language Testing System (IELTS) Examination chu Aizawla exam a nih theih nan exam centre din dan tur an ruahman.

Joseph Lalhimpuia chuan, ram páwna lehkha zir zawm duhte tan remchanna siamsak tumin sorkarin hma a lak thu a sawi a, "He mi kaihhnawihah hian MYC chuan Bristish Council official-te Mizoramah a chah chho a, India hmarchhaka a hmasa pawl ni turin Aizawlah IELTS exam centre kan neih phah dawn a ni," a ti.

MYC Centre, Aizawla IELTS Examination hmachhawn tur hian MYC chuan IELTS coaching class a kalpui mek a, mi 85 an awm. Mahnia exam inhuamte tan pawh IELTS MYC Coaching Class kalpuina leh Mizoram tana Examination Registration Portal tih theihna, Spotlight Coaching Academy, Saron Veng, Aizawlah registration tih theih a ni.