Pathianin Mizo sorkar a din dawn - Zorama

MNF ṭhalaite chuan nimin khan Chanmari YMA Hall-ah Aizawl City Block Workers' Meet an buatsaih a; thu sawitu MNF president Zoramthanga chuan, Pathianin Mizo sorkar a din dawn nia sawiin, "Mizo zawng zawngte huapzo sorkar min dinsak dawn," a ti.

Zoramthanga chuan, tun hmain Mizote sor­kar dinna turah Mizo nationalism dotu chak tak tak - sipai, air force, laipui, machine gun leh politics hmang tea dona a awm ṭhin nia sawiin, "Keini'n 'MN ka sawi thei lo, Zoram hi kan ram a ni' kan tih laiin, anni chuan 'Delhi buhfai ring ṭheuh

ṭheuh, engah nge kan zah bik lem ang le' tiin chal an hnawihsen a, rûi chungin an lám a ni," a ti a; tunah erawh chuan hmanraw hrang hrang hmanga Mizo nationalism dotu Congress an tluchhe tawh niin a sawi.

MNF President chuan, Mizo zirlai leh ṭha­laite zingah nationalism thin­lung a ṭiak nia sawiin, Mizo nationalism dotu ber a chhiat tawh avangin Mizo nationalism champion-puitu MNF hmangin Pathianin Mizote sorkar a din dawn ta niin a sawi a, "Zoramah party dang tih tlak an awm tawh lo," a ti.

Zoramthanga chuan, BJP chu CADC inthlan enin, party thuthlung nei lo, thuneihnaa tuihâl leh an hmelma lian ber pawh thawhpui duh an nih thu a sawi a; Zoram Peoples Movement (ZPM) chu hmun hrang hrangah zin ṭhin mah se, political party an nih loh avangin unit an din thei lo a, unit mah nei loa MLA sorkar tum chu thil har tak niin a sawi bawk.

MNYF president Lal­rin­awma, MLA pawhin thu sawiin, Mizo­ramin khelmual ṭha a nei tih a nih laiin, Asian league-ah Aizawl FC-in home ground atana Mizoram an hmang thei lo chu pawi a tih thu a sawi a, "MNF kan sorkar chuan stadium ṭha leh changtlung zawk, eng level pawh thleng thei tur siam kan tum a ni," a ti.

Nimina MNF ṭhalai Aizawl City Block Wor­kers' Meet-ah hian MNF zawm thar college zirlai leh zirlai hruaitu mi 57 an lawm lut niin MNYF thuchhuah chuan a tarlang.