CM-in textile design training hawng

NEDP hnuaia NGO pakhat, Mizo Heritage-in 'Artistic Tribal Textiles Design Training' an buatsaih chu nimin khan Thenzawl Joint YMA Hall-ah chief minister Lal Thanhawla'n a hawng.

Chief Minister chuan, sorkarin kut hnathawktute hmakhua a ngaihven thu sawiin, "Vawiina NEDP hnuaia textile training hawn tur hi sokarin mipuite duhsakna a lantirna a ni. A chhimtute eizawnna kawnga puitu a nih ngei ka beisei. Handloom sawi chuan Thenzawl hi Mizoramah chuan a langsar ber a ni a, training buatsaih tur hi in chhawr ṭangkai ngei ka ring," a ti.

Training-in a tum ber pakhat chu, puantah hmanga eizawngtuten an thil siam chhuahte man man zawkin tam zawka an hralh theih nan an thiamna tipung a, tih dan phung changkang leh ṭha zawk hmanga khawvel market-ah handloom phochhuah a nih thu CM Hawla chuan a sawi.

Minister Vanlal­awm­puii Chawngthu pawhin thu sawiin, puantah lama tui mite tan hmasawn zelna tura training nei duh, sum harsatna vanga thei lote tan a thlâwna mithiamte zirtirna hnuaia hun remchang sorkar kaltlanga buatsaih a ni chu lawmawm a tih thu a sawi a, "Handloom kut chhuakte hi Mizo hnam ziarang leh kut themthiamna khawvel hmuha phochhuahna remchang leh ṭha tak a ni," a ti.

Training-ah hian mi 150 an tel a, state páwn leh chhunga mithiam sawmte'n puantah leh puandeh chungchang an zirtir dawn a ni.