KHAWTHLIR

Eng awm dawn lo
Power & Electricity department chuan thuchhuah siamin, June 2, 2018 (Inrinni) zing dar 10 aṭanga tlai dar 4 chhungin132Kv Sub Station, Zuangtuiah line siamṭhat hna thawh a nih dawn avangin, he sub station-in a châwm zawng zawngte'n hna thawh hun chhungin kawlphetha an neih dawn loh thu an tarlang.

STAM Award
Science Teachers Association Mizoram (STAM) chuan, nimin khan MBSE conference hall-ah kumin HSLC leh HSSLC exam-a Sciene leh Mathema­tics subject-a tiṭha ber (topper)-te chawimawina hun hmang­in, 'STAM Proficiency Award' an hlan, MBSE chairman F Lian­hming­thanga khuallian a ni. STAM Proficiency Award hi kum 2017-ah sem ṭan a ni.

Minister-in hawng
UGC-Women's Studies Centre, Mizoram University leh Mizoram State Entrepreneurship Development Monitoring Commitee (MEDMOC)-in MZU-a ni hnih awh tur Handloom, Food and Flower Show an buatsaih chu nimin khan Planning minister Lalsawta'n a hawng. Show-ah hian MZU department hrang hranga hotute leh zirlai eng emaw zatin pangpar, ei tur leh handloom hmanga an thil siamte an pho chhuak a ni.

Thisen pe
JC Security-te chuan nimin khan Synod Hospital Blood Bank-ah blood donation camp an huaihawt a, thisen unit 13 an rawn pe.

Lungleiah CCTV
Lunglei khawpui chhung vehimna atan leh traffic control system tihchangthlunna atan, NEDP Core Committee chuan Lunglei khawpuia CCTV dahna atan cheng nuai 145 a pawm. Sum hi Home department-ah dah a ni a, CCTV bun hna pawh Home department-in an buaipui ang.

Kawng hawng
PWD minister Lal Thanzara chuan May 30, Nilaini khan Dinthar Venga MP Hipheia Road a hawng. MP Hipheia Road hian Dinthar Veng thlanmual kawng aṭangin Kanan Veng panna kawng a pawh a ni.