CM-in Press Club tur lungphûm a phûm

Serchhip MJA Press Club sakna tur lungphùm chu May 30, Nilaini khan chief minister Lal Thanhawla'n a phúm. CM Hawla chuan, Mizoram journalist-te'n sorkar nena inlaichinna ṭha an nei chu lawmawm a tih thu a sawi.

Mizoram Journalist Association (MJA) president hmasa ber Lal Than­hawla chuan, Mizorama thuthar thehdarhtute inthlunkhawmna pawl MJA din a nih dan a sawi a, "Thuthar theh­darhtute baihvai taka rambuai karah sorkar sawiselna lam chhuah vanga man mai hlauhawm dinhmun­a ding a, hun khirh an tawn hnuah, tunah chuan zalenna zau tak neiin 'freedom of speech' an hmang ṭangkai a. Ram leh hnam tan hna pawimawh thawk a, circulation zau zawk leh technology changkang tak tak hmang ṭangkai a hna an thawk ta hi a lawm­awm hle," a ti.

Chief Minister chuan, Mizorama thuthar thehdarhtute leh sorkarin inlai­chinna ṭha tak an neih thu sawiin, "Sorkar hmalakna ṭha taka an ṭawiawm ṭhin hi a lawmawm. Thuthar thehdarhtuten zalenna an neih hi an hman thiam poh leh mipui tan a ṭangkai ang. Mipuite thu dik hrilh a, an hriatna kawng hrang hranga tiphui­suitu, sorkar hmalakna ṭha taka tlangzarh a, a ṭha lo laiah pawh huaisen taka sorkar khalh ngil thei tura chhuah chu an tih tur a ni," a ti a; journalist-te chu ram leh hnam tana hna pawimawh tak thawktu an nih thu a sawi.

MJA president Zonungsanga Khiang­te pawhin thu sawiin, Serchhip MJA Press Club tur lungphùm phùm a ni chu lawmawm a tih thu leh building pawh sak thuai theih a beisei thu a sawi a, "Thuthar theh­darhtute chuan sorkar thu pawimawhte puandarh bakah, hmalakna hrang hrang mipuiin an hriat chian theih nan a puandarh hna an thawk ṭhin a, IPR department nen thawkhoin, sorkar hmunhma pawimawhte an tlawh ṭhin a ni," a ti.

Lungphûm phûm inkhawm hi Serchhip MJA vice president Kap­liana Pachuau-in a kaihruai a, Serchhip DC Sang­chhin Chinzah bakah, Serchhipa sorkar department hotute an tel a ni.