MR-te sorkara an luh theihna tihpunah lawm

Mizoram Government Muster Roll Employees Association(MGMREA) chuan, Group C leh D sorkar hna nghet lak tura Muster Roll Regularisation Scheme kaltlanga an luh theihna 35%-ah sorkarin a tihpunsak chu nimin khan Central Hall, Venghluiah an lawm a; IPR minister Lal Thanzara'n a hmanpui.

Lal Thanzara chuan, MR-te chu dinhmun ṭha zawka hlan kai an nih avanga a lawmpui sawiin, "Sorkar chuan a hnathawkte zingah hna hniam thawkte leh hna sang zawk thawkte pawimawh dan angkhat rengah a ngai a, thliar hranna a nei lo. Ṭha­hnemngai tur te, ṭan la zual turte leh eirûkna chi hrang hrang, a lian aṭanga a tê berah inthiar fihlim ṭtheuh turin sorkarin a beisei a ni," a ti.

Sorkar hnuaia MR-a thawkte hi tun hnaia trade union pawl aṭanga an inlâk hran hnuin MGMREA membership enrolment-ah an inziak fel vek lo nâin, tunah hian MGMREA member 3,500 vel an awma chhût a ni. DPAR-in March 22, 2017-a tarlan danin, Mizoram sorkar hnuaia MR zingah engagement card nei 3,568 leh engagement card nei lo - PWD, PHE leh P&E department hnuaia thawk MR 5,669 an awm a ni.