Sorkarna kan siam a nih chuan sawhthing Kg. khat Rs. 50-in kan lei ngei ang - ZPM

Ṭangrual pawl, Zoram Peoples Movement (ZPM) hruaitute chuan nimin khan Aizawl Press Club-ah thuthar thehdarhtute an kâwm a; ZPM-in sorkarna an siam chuan, kut hnathawktute thar chhuah sawhthing kg. khat Rs. 50-a an lei ngei theih tur thu an sawi.

Sawhthing lei tura ZPM-in ruahmanna an siam dan sawitu Dr Vanlalthlana, Pachhunga University College-a Commerce department-a head of department (HoD) chuan, sawhthing chíngtute'n Rs. 50 aia toa hralhna an hriat chuan an duhna hmunah an hralh theih tur thu a sawi a, "State páwn aṭanga tláwm deuh zawk lei a, Mizorama hralh tura lak luh tum an awm thei a, chumi venna tur chu kan siam. Mi hausate'n sum siamna atana sawhthing an hman loh nan ruahmanna kan nei a ni," a ti.

ZPM-in sorkarna an siam chuan sawhthing leina turah harsatna an neih loh tur thu sawiin Vanlalthlana chuan, "Kum 2016-17 khan Mizoramah sawhthing kg. 6,27,43,000 thar a ni a, kg. 10,00,00,000 pawh thar se, kg. khat Rs. 50-a leina atan cheng vbc. 500 a ngai dawn. Rs. 45-in hralh ta ila, subsidy atana sum hman zat tur chu cheng vbc. 50 a ni. Hei hi NEDP leh NLUP atana sum hman aiin a tlem daih a ni," a ti a; subsidy ngai loin, hlêp neih pawhin state páwnah hralh theih a nih thu a sawi.

Dr Vanlalthlana chuan, Mizoram budget cheng vbc. 9400 vel a nih mek thu sawiin, "Subsidy atana cheng vbc. 50 theh chhuah chu a har lo turah kan ngai. NEDP leh NLUP atan pawh an hmang tam hle. A ṭul chuan budget su hêk loin, financial institution - NEDFI, ADB, etc. hnen aṭanga loan lain kan kalpui mai ang. Budget-ah dah a nih dawn avangin, hmasawnna tur sum pawt hêk lo thei ang berin ruahmanna kan siam dawn a ni," a ti.

Sawhthing chu hlâwk zawka hralh a nih theih nan a sawngbawl lam an uar dawn tih sawiin Dr Vanlalthlana chuan, "Subsidy atan sum dah pawh a ngai lo thei. Sawhthing hi sawngbawla thil dang atana hman tura siam a nih dawn avangin raw material a ni mai dawn. Hlâwkna ûma thil tih tum kan nih loh avangin, raw material man a to deuh pawhin, min tibuai lem lo ang," a ti a; sawhthing hralhna tur chu state páwn leh ram páwn thleng pawhin a lungngaih thlak loh tih a sawi.

Dr Vanlalthlana tarlan danin, Mizoram Economic Survey 2017-18-ah a inziah dan chuan, sawhthing man chu Mizoramah chuan bazarah kum 2014-15 ah kg. khat Rs. 75, kum 2015-16 ah Rs. 51 leh kum 2016-17-ah Rs. 50 a ni. Wholesale-in kum 2014-15 ah kg. khat Rs. 56.54, kum 2015-16 ah Rs. 27.93 leh kum 2016-17 ah Rs. 26.11 a ni thung.

Press conference kaihruaitu ZPM general secretary K Sapdanga chuan, ZPM-in sorkarna an siam huna sawhthing kg. khat Rs. 50-a an lei tur thu an puan chu, awih lo leh theih loa ngai an awm avangin, sorkarna an siam hunah sawhthing an lei dan tur leh an buaipui dan tur hi sawifiah an nih thu a sawi.