BSI Aizawl Auxiliary Ruby Jubilee lâwm ṭan

Bible Society of India (BSI) Aizawl Auxiliary chuan nimin aṭang khan an kum 40-na, Ruby Jubilee an lawm ṭan a, vawiin leh naktuk Pathianniah chhunzawm tur niin, Pathianni zanah a ṭiak ang. BSI Ruby Jubilee lawmna hi Mission Veng Kohhran-in an thleng a ni.

BSI Aizawl Auxiliary Ruby Jubilee pual hian nimin aṭang khan Mission Veng Kohhran Hall-ah Exhibition ṭan a ni a, Exhibition hi BSI Aizawl Auxiliary president hlui Rev. C Ronghinga'n a hawng. Nimin chawhnh khan Synod Conference Centre-a Pi Zaii Hall-ah Auxiliary Committee meeting neih a ni a; zanah Mission Veng Kohhran biak-inah Ruby Jubilee Service neih niin, inkhawm bânah BSI Aizawl Auxiliary Youth Committee huaihawt jubilee lawm nan sky lantern 40 chhuah a ni.

BSI Ruby Jubilee Exhibition-ah hian BSI Aizawl Auxiliary leh KṬP, Mission Veng Branch ṭangkawpte'n thil chi hrang hrang 177 an pho chhuak a; chu'ngte chu - Bible bu pum kuta ziah chhuah pariat, Bible edition hrang hrang hrang 57, Naupang Bible pakhat, Bible for Children pariat, Talking Bible (Bible ṭawng thei) pathum, Zosap missionary-te bungraw hlui pahnih, BSI Aizawl Auxiliary award dawn paruk, BESY Melody leh BESY Choir audio album hrang hrang 34, thlalak 13, thuziak hlui 11, lehkhabu leh Bible commentary hlui 33-te a ni.

BSI Aizawl Auxiliary Ruby Jubi­lee lawmna kal zelah vawiin chaw­hma dar 11 hian Bible House thlang síra GAD quarters ṭhinah Bible House thar sak tur lungphûm chief minister Lal Than­hawla'n a phúm dawn a; chaw­hnuah Synod Conference Cen­tre-ah Auxiliary Annual Meeting neih a ni ang a, tlaiah jubilee lawmna zanriah kîlho a ni ang.

BSI Aizawl Auxiliary ruby jubilee lawmna hi BSI hmunpuia general secretary Rev.Dr M Mani Chacko, Karnataka Auxiliary secretary Rev.Dr Vasant Renick, Shillong Auxiliary secretary Rev. P Dhakar, Dimapur Auxiliary secretary Rev.Dr ZK Rochill ten an hmanpui a; Shillong Auxiliary Standing Choir-te zaia rawngbawl turin an tel bawk.

BSI Aizawl Auxiliary Ruby Ju­bilee lawm nan hian BSI Aizawl Auxiliary hnuaia Youth Commi­ttee chuan April 30, 2018 khan Aizawlah Two Wheeler Jubilee Ride an lo huaihawt tawh a ni.

Bible Society of India hi Mizoramah chuan December 8, 1957-ah Lungleiah Lung­lei Branch tiin din a ni a, Decem­ber 11, 1957-ah Dawrpui Pres­byterian Kohhran biak-inah Aizawl Branch din leh a ni. June 1, 1978-ah Aizawl chu Asso­ciate Auxiliary-ah hlan kai niin, February 25, 1983-ah Auxiliary puitlingah hlan kai a ni a; Associate Auxiliary-a hlan kai ní, June 1 chu BSI Aizawl Auxiliary din ní-ah pawm a ni.