Mirethei tana Durtlanga in sak thar hawng

Urban Development and Poverty Alleviation (UDPA) minister Zodintluanga chuan nimin khan Durtlanga Economically Weaker Section (EWS) Housing Complex a hawng. In sak thar chu a luahtute an awm duh chhung chu an ta a nih tur thu a sawi.

UDPA Minister chuan, mi rethei, chenna in nei zo lote tan sorkarin in, 'Ka ta a ni' an tih ve theih tur ṭha tak a saksak tih sawiin, "An awm duh chhung chu an tu leh fate thleng pawhin an awm thei a, he in hi an ta a ni. Mi retheite khaichhuah nan sorkarin ṭan a la a, sorkar laipui scheme bakah Mizoram sorkarin NLUP a kalpui a ni," a ti.

Zodintluanga chuan, Mizo­rama district dangah pawh scheme dang hmangin mi rethei in 1,950 sak a nih tawh thu sawiin, "In hmun nei, a sakna tur nei lote tan Housing for All hmangin sorkar kum kal taah in 17,670 sak theihna tur sum sanction hmuh a ni a, sorkar kum kal mekah in 11,684 sak theihna tur chu UDPA-in a buaipui mek bawk," a ti a; NEDP hnuaiah CM Rural Housing Scheme hmangin thingtlanga miretheite in sakna tur leh thawm ṭhatna tur sem mek a nih thu a sawi bawk.

Bialtu MLA, minister R Romawia pawhin thu sawiin, EWS Housing Complex-ah hian thingtlang khaw lian tak tiat zet vêng hrang hrang aṭangin chhungkua an pém lut dawn tih a sawi a; chuvang chuan, a luahtu tur chhungkuate chu khawtlang leh kohhran hruaitute zài ngai a, inngeih taka awm turin a chah.

Durtlanga EWS Housing Complex hi kum 2009-ah sak ṭan a ni a, sorkar laipuia Ministry of Housing and Urban Poverty Alleviation hnuaiah JNNURM kaltlangin Basic Services to Urban Poor (BSUP) sum nuai 2,624 hmanga sak a ni. Inte chu a vaiin block 20 niin, chhungkaw 320 luah theih tura sak a ni a, a zau zawng chu sq.metre 27.62 a ni. Chhungkaw pakhat tan tui litre 500 dawng tuizêm dah vek a ni a; sorkar laipuiin a luahtu chhungkaw tin chu a do letna tur Rs. 20,000 pe tura a tih laiin, an chawi turte chu Mizoram sorkarin a chawisak vek a ni.