KHAWTHLIR

Zu siamna tichhia
Excise & Narcotic enforcement staff-te chuan nimin khan Phunchawng leh Rangvamual ramhnuaiah an dap a, zu sakna hmun eng emaw zat an tichhia. Rakzu litre 110, zu bilh lai ṭín 454 leh zu bilhna bêl 64 an man bawk.

Tlân phal lo
Vawiin leh naktuk hian zing dar 8 aṭanga tlai dar 4 inkarah Tennis Court aṭanga Dinthar panna kawng (Kaisara Road) siamṭhat hna thawh a ni dawn a, hei vang hian hna thawh hun chhungin lirthei tlân phal a nih dawn lo. Hemi chungchangah hian Traffic SP H Ramthlengliana'n nimin khan thupek a chhuah a ni.

Motor hlân
Chief minister Lal Thanhawla chuan nimin khan National Cadet Corps (NE Region) additional director general Maj.Gen. Raju Chauhan hnenah lirthei (Bolero) thar pahnih a hlan. Lirtheite hi Aizawl leh Lungleia NCC hmalakna hrang hranga an hman tur a ni.

Secretary-in tlawh
GAD secretary Ashish Kundra chuan nimin khan Kolasib a tlawh a, department hrang hrangte hmalakna a enfiah bakah, department hotute nen an inkâwm. Inkawm khawmnaah hian Kolasib DC Dr Arun T chuan an hmalakanate a lem nen a sawifiah a ni.

Kawngpu enfiah
Road Protection Squad for Mamit chuan nimin an chairman HD Lalpekmawia, SDO(S) hoin khan Mamit khawpui chhunga vantlang kawngpuite an enfiah a, vantlang kawngpuia mipui an him zawk nan leh lirthei veivâk a awlsam zawk nan kawngpui dâla in sakna bungrua dah te, workshop neitute motor siam lai kawng kama dah te, vantlang kawngpui ei hêka mimal insa mekte leh kawngpui tana hnawka in sate chu an thil tih chawlhsan turin an hriattir.

Zirlai chawimawi
Serchhip MSU chuan nimin khan DC coonference hall-ah kumin HSSLC result chhuaka zirlai tiṭhate chawimawina hun an buatsaih a, DC Sangchhin Chhinzah-in a hman pui. Zirlai chawimawina hlante hi mi 51 an ni.