Damdawi-in hmasawnna tur sawiho

Champhai Ṭhalai Pawl (CṬP) chuan nimin khan Champhai District Hospital chungchangah medical superintendent Dr Zatluanga an kâwm a, damdawi-in hmasawnna tur an sawipui.

Dr Zatluanga chuan, kum khat liam ta aṭangin sorkarin a enkawl danah lawmawm a tih thu a sawi a, "Bungraw thar a rawn thlen belh reng a, tunah pawh inzaina room (operation theatre) thar buaipui mek a ni. Tunah hian khum 100 awm theihna anga kalpui ni mah se, thawktu indaih lohna a nasat avangin harsatna kan tâwk a, doctor mai bakah, sister, nurse leh grade-IV thlengin kan indaih lo a ni," a ti.

Khaw ṭhenawm leh thingtlangahte mi harsa zawkte tana feh chhuah duh ṭhin mah se, a kalna tur motor lamah harsatna an tawh avangin an duh angin an kal thei lo tih sawiin Dr Zatluanga chuan, "Mi inphalte'n hetiang lamah hian hma la thei awm se a duhawm hle," a ti a; tuna motor an kawl ṭhenkhatte chu kum 2005 vela NBCC-in an pek a nih thu a sawi.

CṬP hruaitute chuan, Champhai District Hospital-in harsatna an neihte chu chinfel a nih theihna atan sorkar hotute hnenah theihtawp chhuahpui an tum thu Medical Superintendent an hrilh a ni.