Lungleiah Entrepreneurship Conclave

NEDP hnuaia hma­lakna pêng pakhat, Entre­­preneurship Development Scheme (EDS) kaltlangin nimin Lunglei Convention Centre-ah ‘Mizoram Entrepreneurship Conclave 2018’ buatsaih a ni a, Planning minister Lalsawta'n a hawng.

Lalsawta chuan, EDS chu ram hmasawnna chak taka kalpui a nih theihna tura duan chhuah a nih thu sawiin, "He scheme kaltlang hian ṭhalai tam zawkin mahni kutkawiha eizawnna kawng an zawh theih nan nasa taka hmalak a ni. Mizo ṭhalai, sumdawnna bul ṭan tumte tan nikum aṭang khan Business Plan Contest (Mizoram Kailawn) leh Micro Start Up Capital (Mizo­ram Rahbi) hlawh­tling taka kalpui a ni," a ti.

Planning Minister hian Mizoram State Entre­preneurship Development Monito­ring Committee (MEDMOC)-in lehkhabu an buatsaih ‘Report on Entrepreneurship Development Scheme’ a tlangzarh nghal a ni.

Mizoram Youth Com­­mis­sion (MYC) chair­man Joseph Lalhim­puia, MLA pawhin thu sawiin, entrepreneurship lama ṭhalaite fuihna leh cho chhuahna hun ṭha Mizoram Entre­preneurship Conclave 2018 Lungleia nghah a ni chu ropui a tih thu a sawi a; ṭhalaite chu Conclave ṭangkai taka an hman theih­na atan duhsakna a hlan.

Chawhnu lamah technical session buat­saih a ni a, Lunglei khaw­puia bank hrang hrang manager-te leh entrepreneuship lama mithiamte an tel a, entrepreneurship chung­chang sawiho a ni.

Conclave-ah hian stall 26 siam a ni a, Micro Start-up Competition-a ti ṭha thlan chhuahte'n an thil siam an phochhuak. Micro Start-up Compe­tition kalhmang leh competition-a tel tura an inpuahchah dante leh entrepreneurship lama hriat duhte heng zawhfiah theih a ni. Conclave hi vawiinah chhunzawm a ni ang.