Social Welfare-in mihringa sumdawnna Tuartu mi 21 an chhan chhuak tawh
Social Welfare department chuan May 31, Ningani zan khan Hunthar Veng MHIP Hall-ah 'Awareness on Anti Human Trafficking' an buatsaih. He hunah hian, Social Welfare department-in mihringa sumdawnna (human trarfficking) case 21 dawngin, a tuartute an chhan chhuah vek thu tarlan a ni.
Awareness on Anti Human Trafficking-ah hian Social Welfare director Laldikkimi'n thu a sawi bakah, mihringa sumdawnna chungchanga mipui hriat tur pawimawhte tarlanna poster leh leaflet a tlangzarh. SJDI director Jimmy Laltlanmawia'n human trafficking awmzia leh inven dan tur a sawi a; Protective Home superintendent Dr R Lalnunmawii'n human trafficking chungchanga khawtlang hmalakna turte a sawi thung. Zawhna leh chhanna hun hman a ni bawk.
Inkhawma an tarlan danin, Social Welfare department chuan human trafficking case report 21 an dawng tawh a, chu'nga a tuartute an chhan chhuak vek a ni. Report an dawn dan chu - Aizawl district-ah pakua, Kolasib leh Champhai district-ah pathum ve ve, Serchhip district-ah pahnih, Lunglei leh Mamit district-ah pakhat ve ve leh, Churachandpur-ah pahnih a ni.
Reporft an dawn 21-a a tuartu an chhan chhuahna hmunte chu - Chennei-ah 14, Mumbai, Pune leh Hyderabad-ah pahnih ṭheuh leh, Mumbai-ah pahnih a ni.
Protective Home superintendent Dr R Lalnunmawii tarlan danin, Mizo ṭhalai zingah state páwn leh ram páwnah hna thawk tura chhuak eng emaw zat an awm a, chu'ngte chu spa leh beauty parlour angahte an thawk tlangpui.
Mizo ṭhalai eng emaw zattte thawhna chu belhchian leh enfiah hmasak awm loin, sum thawh chhuahna tur a nih avangin a remchan ang angin an thawk mai ṭhin a, hursualna lam thil a thlen phah fo ṭhin. Spa leh beauty parlour-a thawk turte chu belhchian dâwl leh sorkar pawmpui hmun ngeia thawk turin an ngen a ni.