Industry tuichhia leh bawlhhlawh chungchanga thupek zâwm lote power supply tihtawpsak theih

Supreme Court thupek angin, industry lian leh tê aṭanga tuichhia leh bawlhhlawhte tithianghlim loa paih phal a ni tawh lo. Hei vang hian Mizoram Pollution Control Board (MPCB) hotute chuan Power & Electricity department nen ṭangrualin Court thu zawm lo industry neitute kawlphetha (power supply) tihtsawpsak thlenga hmalak a ṭul tawh dawn tih an sawi.

MPCB hotute sawi danin, Mizorama industry-te chu Supreme Court thupek anga an thli, tuichhia leh bawlhhlawhte paih mai mai tawh lo turin MPCB-in hun a pe leh mek a; hemi chungchangah hian industry tam takin an hmalakna report thehlut tawh mah se, bakery pathum, hotel pali leh food processing industry pathumin report an la thehlut lo.

Air (Prevention and Control of Pollution) Act,1981 te, Water (Pre­vention and Control of Pollution) Act, 1974 leh Environment (Protection) Act, 1986-te India ramah hman theihin a awm sa a; chutih laiin, heng dânte hi India rama Pollution Control Board hrang hrangin an kengkawh ṭha tawk lo nia hriat vangin Supreme Court chuan Writ Petition (Civil) 375 of 2017 hmanga thutlukna a siamah, industry-te'n tuichhia leh bawlhhlawh an sâwngbâwl dan turah thupek a tichhuak a ni.

Industry aṭanga tuichhe paih chi ho - bakery, hotel, slaughter house, food processing leh a kaihhnawihte chuan effluent treatment plant (ETP) an nei vek tur a ni a; an neih loh chuan industry-te chu P&E department nen ṭangkawpin an power supply tihtawpsak theih a ni.

Industry aṭanga tuichhiate chhuak turte chu tihthianghlim hmasak tur a ni a; chumi bawhzui chuan MPCB chuan Aizawla industry-te chu a hmunah an endik tawh a, ETP nei lote chu thla hnih chhung siamna hun an pe. Industry zingah hian ETP nei tawh an awm nual.

MPCB hotute sawi danin, ETP ti tura an tih zingah chhang siamna (bakery) pakua zinga parukin ETP an kalpui dan report an thehlut tawh a, hotel paruk zinga pahnih leh food processing paruk zinga pathumin an thehlut tawh bawk. Mizoramah hotel 24 awmin, chu'ng zinga Aizawla hotel lian pakhat chuan MPCB-ah dilna an thehlut lo thung.

Aizawla damdawi-in lian zingah ETP kalpui ve lo damdawi-in pakhat a awm. Chawnpui, Aizawla damdawi-in sak mek Ebenezer Hospital chuan ETP leh STP an siam nghal a, a kalpui kawp awm chhun tur an ni.

Damdawi-in dangte erawh chuan ETP kalpui mah se, STP an kalpui hlei thei lo thung tih an sawi. Synod Hospital chu ETP kalpui ṭha ber a ni a, damdawi-in tê zingah BN Hospital, Kulikawn-in an kalpui ṭha ber a ni.

Damdawi-inte chuan taksa bung hrang paih ngai chi (anatomical waste) chu chi 10-ah ṭhenin, thisen kai chi lapua, bandage, etc. chu paih hmaa sawngbawl fai phawt a, chhûm thianghlim phawt a ngai.

Plastic/thisen chaw báwm, zun ip, etc ang chite chu paih hmain tihfai phawt tur a ni a; darthlalang no lam chi pawh hman hnuah paih hmain tihthianghlim phawt tur a ni. Damdawi-in tinah waste management commitee an awm tur a ni a, tunah hian damdawi-inte'n an din nual tawh.

ETP hi nei nual tawh mah se, engtin chiah nge bawlhhlawh leh tuichhia an sawngbawl tih erawh finfiah a har deuh niin MPCB hotute chuan an sawi. Finfiah tur chuan tuichhia an paihte lâk a, khawl hmanga finfiah a ngai.

MPCB hotute hian industry leh damdawi-inte chu kum khatah vawi khat an en chhuak ṭhin a ni.