Lungin maxi-cab a delh ; Mi pahnih an thi

June 2, Inrinni tlai dar 4 vel khan Aizawl leh West Phaileng inkara tlan maxicab FD Travels chu Rawpuichhip aṭanga km. 2 vela hláah kawng chhak aṭanga lung tlain a delh a, mi pahnihin nunna an chán a, mi dang an hliam.

Rawpuichhip YMA hruaitute hnen aṭanga thu dawn danin, maxicab-ah hian driver nen mi pakua an chuang a; Hualthangi (42), Khawhnai chu vanduaina thlenna hmunah a thi a, Ramnunsiami (56), Manipur chu Rawpuichhip damdawi-in thlenpui a nih hnuah a thi leh bawk. Mi dang pasarihte chu an hliam vek a, Rawpuichhip damdawi-inah enkawl niin, ngaihtuahawm lutuk an awm lo.

Mitthite hi zanah postmortem theih a nih loh avangin, Rawpuichhip YMA-in kuang siamsakin an tlaivarpui a, nimin khan postmortem niin, an khaw lam panpui nghal an ni. Hualthangi hi Rawpuichhip aṭangin an khua panpui a ni a, Ramnunsiami chu Rawpuichhip YMA-te'n Aizawl thleng an thlah a ni.