SIPMIU motor lei dan sawifiah turin MNF Ṭhalaiin UDPA Minister an phût

Mizo National Youth Front (MN­YF) hruaitute chuan Inrinni khan Aizawl Press Club-ah thuthar theh­darhtute an kâwm a; SIPMIU-in to takin bawlhhlawh phur tur lirthei an lei nia sawiin, sawifiah turin UDPA minister Zodintluanga an phût.

MNYF vice president H Ram­dinliana chuan, Aizawl khawpuia bawlhhlawh paih nan SIPMIU-in Tata 407 LPK tipper 50, a hring 25 leh a pawl 25 an lei tih a sawi a, "Heng motor-te hi to uchuak taka lei a ni. A changtu minister Pu Zodintluanga hi a inrawlh kan ring tlat a, hetianga to uchuak taka lei a nih chhan hi sawifiah ngei turin kan phût a ni," a ti.

H Ramdinliana sawi danin, SIPMIU hian motor leina tur quotation an ko a, Mizoram chhunga motor dealer zingah an lei duh ang motor hi Tata chauhin an neih avangin Tata motor lei loh theih loh a ni.

Tata 407 LPK tipper, a hring (green) 25 leina man chu July 5, 2017-ah cheng nuai 400 leh August 17, 2017-ah cheng nuai 85.06 pek a ni a; tipper hring 25 leina man chu a vaiin cheng nuai 530 niin, pakhat man chu cheng nuai 19.87 a ni.

Tipper pâwl (blue) leina man chu June 16, 2017-ah cheng nuai 496 pek a ni a, chawhrualin, pakhat cheng nuai 21.26 man a ni.

H Ramdinliana chuan, motor hring leh pâwl man inthlauhna chu pakhatah cheng nuai 1.35 a nih thu sawiin, "Hetiang em ema motor man inthlau hi a mak viau tawh lai a, to uchuak taka an lei thei hi minister thu lo chuan official tan tih ngam chi niin a lang lo. Hetah ringawt pawh hian a tuiháng hi a tui tham viau tur a ni. A rawng vanga motor man inthlauhna hi motor 25-ah chuan cheng nuai 33.77 a ni," a ti.

MNYF hruaitute chuan, SIPMIU-in motor an lei lai hian an Tata 407 LPK chu Rs. 9,80,000 vel man a nih thu an sawi a, "SIPMIU hian tipper body pangngai (thir chhah) lei tel loin, a aiah plain sheet pangngai hmangin a body an zawm sáng thung. An hmanraw hman en hian, motor man han to phahna tur a awm lo a, a lo to phah a nih pawhin, cheng nuai 3 aia tama to phah thei a ni lo a, nuai 3 aiin a tlem zawk hialin kan ring," an ti.

LPK 407 tipper 50 leinaah hian mipui sum cheng nuai 500 aia tlem lo a luan ral thu sawiin MNF ṭhalai hruaitute chuan, "Cheng vbc. 5 tlem lo mipui sum hi khawiah nge a awm tih hi UDPA Minister kan zâwt a ni. Hetiang thil dik lo awmte chhui chhuak a, a ti dik lotu hrem ngei turin sorkar kan phût tlat a ni," an ti a; sum awmna sorkarin a chhui chhuah loh chuan an chhui zel tur thu an sawi bawk.