Bible House thar tur lungphùm phúm

Leilung a chêt vanga MG Road, Aizawla Bible House ṭhiah tâk chu a thlangah sak ṭhat a ni dawn a; a sakna tur, BSNL pisa thlanga GAD quarters hmunah June 2, Inrinni khan chief minister Lal Thanhawla'n Bible House sak thar tur lungphùm a phúm.

Chief Minister chuan, lei chêt vanga Bible House leh a bul inte chhuahsana inthiar chhuah a ngai chu pawi a tih thu sawiin, "Sorkarin Bible Society of India (BSI) hotute nen inbiain, a an awm zel dan tur a ngaihtuahsak a, tuna Bible House sakna tur hmun thar hi ruahman a ni ta a ni," a ti a; Bible House sak leh a nih theih nana Home Minister, Finance Minister, UDPA Minister leh Revenue Minister-te hmalakna lawmawm a tih thu a sawi.

Lal Thanhawla chuan, Mizo­ramin Chanchin Ṭha a hril chhung chuan Mizo hnam chu chîmrala an awm a rin loh thu sawiin, "Ringtute'n ni tin nunah ringtu an nihna kan lan chhuahtir a pawimawh. Khawvela sakhua lian ber berte hual behin kan awm a, ṭhenawm tlan gram state dangte aiin Chanchin Ṭha kan dawng hnuhnung a. Chuti chung chuan rawngbawlna leh Chanchin Ṭha hril kawngah hma kan sâwn zel a ni," a ti.

Bible House sakna tur hmun, GAD quarters awmna ṭhin hi Mizo­ram sorkarin BSI, Aizawl Auxiliary hnenah a pe a, Bible House ṭhiah tak hmun chu BSI-in sorkar kutah a hlan ve thung.

Bible House sakna atan hian UDPA depart­ment kaltlangin Mizoram sorkar chuan cheng nuai 407 a tum dawn a a, Mizo chhiara chhâwng riat tur a ni.

Bible House thar tur lungphùm phùmna inkhawm hi BSI, Aizawl Au­xi­liary president Rev.Dr H Van­­lal­auva'n a kaihruai a; BSI-a gene­ral secretary Rev.Dr M Mani Chacko-a'n Pathian hnenah a hlân. Lung phùm inkhawmah hian Home minister R Lalzirliana leh UDPA minister Zodintluanga te pawh an tel a ni.