KHAWTHLIR

Conclave khâr
Mizoram State Entrepreneurship Development Monitoring Committee (MEDMOC) leh Lunglei High Powered Committee (HPC) ṭangkawpin, Lunglei Covention Centre-a ‘Mizoram Entrepreneurship Conclave 2018’ an buatsaih chu Inrinni khan khâr a ni. Conclave-ah hian stall 26 siam a ni a, Micro Start-up Competition-a tiṭha thlante'n an thil siamte an pho chhuak a ni.

Thisen pe
YMA, Mission Veng Branch chuan Inrinni khan Aizawl Civil Hospital tan thisen unit 19 an pe a, a petute mipa 18 leh hmeichhia pakhat an ni. PYD, Dinthar, Aizawl pawhin Synod Hospital tan thisen unit 37 an pe a, a petute mipa 30 leh hmeichhia pasarih an ni.

Zirlai chawimawi
Reiek MZP chuan Inrinni khan an huam chhunga HSLC leh HSSLC pass tharte chawimawina hun Reiek Convention Centre-ah an buatsaih a, an hun hmanpuitu bialtu, MLA Lalrobiaka'n zirlaite chu social media hman dan thiam turin a chah. Inkhawmah hian Reiek khaw chhuak Lalnunmawia Chuaungo, IAS chu chawimawina hlan nghal a ni.

YMA luang chhuak
Venghlui Branch YMA chuan an kum 50 tlinna, golden jubilee pualin luan chhuahna hun an hmang. June 1, Zirtawpni zan khan Pisa Tlang (Treasury Square)-ah a duh apiang ei turin artui leh thingpui an sem a, June 2, Inrinni khan nilêngin Aizawla damdawi-in awm zawng zawngah damlote tan artui leh bawnghnute an sem bawk.