Kan sorkar tûkah sorkar hnathawkte Kut phuar kan phelh dawn - Duhoma

Ṭangrual pawl, Zoram Peoples' Movement (ZPM) chief ministerial candidate Lalduhoma chuan, ZPM-in sorkarna an siam chuan, an sorkar tûk aṭangin sorkar hnathawkte kut phuar an phelh dawn tih a sawi.

Lalduhoma hian June 1, Zir­tawpni zan khan Serchhip Hmarveng YMA Hall-ah ZPM vantlang inkhawmah thu sawiin, sorkar hnathawkte chu Congress sorkarin an kut a phuarsak nasa lutuk niin a sawi a, "NLUP dawng tur te, in sak ṭanpuina dawng turte ruling party worker hoin an thlan khalh vek zel a, departmental work-a thawh tur zawng zawng an hauh zel bawk. Tunah chuan political party-ah an side lam pawh an tilang ngam tawh lo. Hengte hi ZPM sorkarah chuan kan titawp ang a, sorkar hnathawk kut phuar hi kan sorkar tûk aṭangin phelhin a awm nghal ang," a ti.

Lalduhoma chuan, chief minister Lal Thanhawla'n March 2011-a Serchhip District Hospital sakna tur lungphùm a phùm tawh, tun thlenga a ban pakhat pawh la phun loh chu ZPM a sorkar chuan an sa ngei dawn tih a sawi a, "Serchhipin gas-a harsatna in tawh apiangin sorkarin mawhphurhna kan la tawh ang," a ti a; Serchhip bialtuin vawi hnih/thum a lo tiam tawh Zawlpui Châwmkai lei pawh an dawh ngei tur thu a sawi.

ZPM CM Candidate chuan, Congress leh MNF ten sorkarna an chelh kum 30 chuang chhungin eng kawngahmah intodelh a la ni lo tih sawiin, "Mipui rilru an tibeidawng em em a, kan sorkar hrawn mek phei chuan zu an zuar zui a, ‘Zu zawrh hi kohhran hote ṭawngṭai chhànna a ni’ min tih khum a. Congress emaw MNF emaw kan la thlang leh dawn a nih chuan, ‘Setana nge diabola kan thlan ang’ tih ang vel a ni," a ti.

Sorkar inthlak ringawt change a ni lo a, CM thlak ringawt change a ni lo tih sawiin Duhoma chuan, "Kalphung zawk kan thlak a ngai. System thlak ngam ZPM kan rawn lang a, Zoram mipui hian min ring teh u, rin ngam kan nih leh nih loh min fiah ve teh u. Kan rintlak ang, kan rinngam bawk ang," tiin mipui a sáwm a ni.

ZPM CM candidate Lalduh­oma hian June 1 chhun khan Chhiah­tlang Bazarah vantlang inkhawm a nei a, zanah Serchhip Hmarveng YMA Hall-ah a nei leh a; June 2, Inrinni zing khan Serchhip Bazarah vantlang inkhawm a neih leh bakah, chhun­ah Thenzawl ZPM Steering Committee-te nen an inkâwm bawk.