BSI Aizawl Auxiliary-in kum 2017-18 chhungin Rs. 5,76,72,312 an hmu

Bible Society of India (BSI) Aizawl Auxiliary chuan an sum kum, financial year liam ta 2017-18 chhung khan Rs. 5,76,72,312 an hmu a, India rama BSI auxiliary zingah Aizawl Auxiliary hi sum thawk chhuak tam ber a ni a; Rs. 5,14,91,538.74 an hmang thung. BSI, Aizawl Auxiliary hian June 1-3 chhung khan Mission Veng Kohhran biak-inah an kum 40-na, ruby jubilee an lawm a, nizan khan a ṭiak.

June 1, Zirtawpnia Synod Conference Centre-a an meeting-a tarlan danin, BSI, Aizawl Auxiliary hian April 2017 - March 2018 chhunga sum an hmuh zawng zawng Rs. 5,76,72,312 zinga Rs. 3,70,47,667 chu BSI-a tel kohhran hrang hranga BSI branch leh Auxiliary-in an thawh khawm a ni a, Bible leh thil dang hralhna aṭangin Rs. 2,01,69,273 hmuin, thil dang aṭangin Rs. 4,55,372 an hmu bawk. BSI branch hrang hrang zinga thawh tam ber, Aizawl North-II in Rs. 42,46,557 an thawh.

Kum khat chhunga an sum hman Rs. Rs. 5,14,91,538.74 zinga Rs. 1,71,68,162 chu Bible leh Bible kaihhnawih thil dang chhut nan an hmang. Sum hman aia lak luh a tamna hi Rs. 61,80,773.26 a ni.

Kum 2017-18 chhunga BSI Auxiliary 18-te zingah Aizawl Auxiliary hi thawhlawm thawh tur tuk zat (target) nei tam ber a ni a, sum thawh khawm tam ber (Rs. 3,70,47,667) a ni bawk. Target Rs. 3,50,00,000 khûmna chu Rs. 20,47,667 a ni. Sum thawh khawm tam ber dawttu Tamil Nadu Auxiliary-in Rs. 2,20,11,909 an thawh a, pathumna Andhra Pradesh Auxiliary-in Rs. 2,00,38,384.09 an thawh thung.

BSI Aizawl Auxiliary hian kum 2017-18 chhung khan Bible 67,538 chhuah tumin target an siam a, mahse, 51,717 an chhuah thei a ni.

BSI Aizawl Auxiliary ruby jubilee lawmna, Mission Veng Kohhran biak-inah neihah hian nimin chawhma inkhawmah lawmthu sawina ṭawngṭai rualna hun hman a ni a, United BESY Choir-in music video album thar an siam chu BSI general secretary Rev.Dr M Mani Chacko-a'n a tlangzarh. May 1 zan khan jubilee lawm nan Youth Committee bultumin Synod Office kawt aṭangin meithallâwn 40 chhuah a ni bawk.