MYC leh ALS-in Inremna an ziak

Mizoram Youth Commission (MYC) leh IAS coaching centre, Alternative Learning System (ALS), New Delhi-te chuan Mizo ṭhalai 180 tan IAS online coaching leh HSSLC (science) zirlai mi 400 tan IIT-JEE/NEET online coaching kalpuina turin MYC chairman Joseph Lalhimpuia pisaah inremna an ziak.

Inremna ziah inkhawmah Joseph Lalhimpuia chuan, MYC online coaching-a kalte zinga mi 200 hnenah ALS-in scholarship a pek dawn thu sawiin, "MYC online coaching kalpuina tur satellite khawl, Very Small Aperture Terminal (VSAT) pawh MYC mamawh tur ang ALS-in an rawn bun nghal dawn," a ti a; VSAT khawl pakhatin classroom pahnih zel châwm thei tur MYC-in an chah thu a sawi.

ALS hotu Prateek Bhattacharya chuan, ALS leh MYC inremna thuthlung sawifiahin, "MYC hian India rama IAS coaching institute lian ber pawl inremna thuthlung a ziahpui a ni. ALS hian India ram pumah IAS rank no. 1 vawi thum a hauh tawh a, kum 2017 IAS exam result kumin 2018-a tihchhuahah IAS-a tling 244 kan nei," a ti a; kum 2013-2018 chhungin an hnuaia kal mi 990 IAS-ah an tlin thu a sawi.