Lunglei DC-in ramri hungna a enfiah
Lunglei DC Ankita Chakravarty chuan June 1, Zirtawpni khan zan khat riakin Tlabung a tlawh a; Tlabung leh a chhehvela India leh Bangladesh inrìna hungna hmun tlawhin, mipui dinhmun a enfiah.
Lunglei DC hi Tourist Lodge-ah Tlabung khawtlang hruaitute'n an lo hmuak a; khawtlang hruaitute leh mipuite chuan an mamawh hrang hrang - kawlphetha mumal loh vanga harsatna an tawh ṭhin te, hriselna lama thawktu indaih loh vanga harsatna an tawh te, an tui tlan chungchanga harsatna an tawhte leh khawtlang mamawh chi hrang hrang an lo thlen a ni.
Tlabung SDO(C) pisaah Lunglei DC ho hian sorkar official-te'n India leh Bangladesh ramri hung hna thawhin a kaihhnawih chi hrang hrang - ramri hung vanga a bul hnaia mite'n buh leh thlai chìnna hmun an chàn chungchang te, border fencing enkawl zui zel dan tur te, tun thlenga ramri hung páwna la awmte harsatna chinfel dan turte leh corporate social responsibility chungchangte an sawiho.
Ankita Chakravarty hian Inrinni khan Tlabung chhehvela India leh Bangladesh inrina hungna hmun tlawhin, mipuite dinhmun a hmunah a enfiah a; Inrinni vek khan Lungleiah a haw a ni.