Cabinet-in 7th Pay an pawm

Council of Minister chu nimin khan chief minister Lal Thanhawla hoin CS conference hall-ah an ṭhukhawm a, agenda 45 leh addi­tional agenda 12 an ngaihtuah a, Mizoram hnuaia sorkar hnathawkten 7th Pay anga hlawh an lak theih dan tur zirchiang tura dinte'n report an thehluh chu an pawm.

Cabinet hian Finance dept.-in 7th Pay zirchiang tura dinte'n rawtna an thehluh pawmpui tura rawtna 'Proposal of approval of the report of the Pay Committee 2017 (for extending Central Civil Service (revised pay) Rules, 2016 to government of Mizoram employees)' chu sawihoin, Pay Committee-in rawtna a thehluh chu tlem tidanglamin an pawm.

Cabinet-in a pawm dan chuan sorkar hnathawk nghet (regular employees) 42,000 bakah pension la mek te, adhoc-a thawk te, contract-a thawk te, deficit school-a thawk te, UGC scale-a zirtirtu te, state sorkar hnuaia Public Sector Undertaking a thawkte leh autonomous district council hnuaia thawk mi 34,000 bawr velte hlawh thar tur hian a huam ang.

Hlawh thar tur hi ni 1.1.2016 aṭanga implement tura tih a ni a, mahse Mizoram sorkar sum dinhmun enin financial benefit erawh September 1, 2018 aṭanga pek tura tih a ni. Hlawh thar hman a nih dawn avang hian Mizoram sorkar chuan kum khatah cheng vbc. 400 vel a sen belh a ngai dawn.

Cabinet hian district chunghang zirchiangtute rawtna an thehluh 'Report of the recommendation of the District Re-organisation Committee' chungchang pawh a ngaihtuah a, he thuziah lai hian an thutlukna kan hre hman lo.

Meeting-ah hian PWD, PHE leh P&E dept. hnuaia muster roll-te dah ngheh chungchang pawh ngaihtuah a ni a, heivang hian department pathuma muster roll-te chu meeting thuchhuak ngai changin Secretariat Complex bulah an ṭhukhawm a ni.

Cabinet meeting-ah hian R Lalzirliana, R Romawia, Lalsawta, H Rohluna, Zodintluanga, John Rotluangliana, Lal Thanzara, C Ngunlianchunga leh Vanlalawmpuii Chawngthu-te an tel.