St. Pauls' HSS-in zirlai ti ṭhate chawimawi

St. Paul's Higher Se­con­dary School leh Paulians Alumni Associa­tion chuan nimin khan an sikul aṭanga kumin HSLC leh HSSLC-a top 10-a tlingte leh subject mala mark hmu sangte chawimawina, Paulians’ Proficiency Award 2018 an hlan a, chief minister Lal Thanhawla'n a hmanpui.

Chief Minister chuan, HSLC leh HSSLC exam-a zirlai ti ṭhate chu a lawmpui thu sawiin, "An nu leh pate inpekna, an zirtirtute thawhrimna leh mimal taimakna vanga hlawhtling an ni," a ti a; zirlaite chu khua leh tui ṭha, ram innghahna an nih theih nan an zirna lama theihtawp chhuah a, Zo nun mawi leh aia upa zahna vawng reng turin a chah.

Lal Thanhawla chuan, zirlaite'n hmathlir ṭha an neih a, inpuahchahna ṭha an neih theih nan sorkarin kawng hrang hranga hma a lak thu sawiin, "Zirna quality ṭha zawk Mizoramin a neih theih nan Education Reforms Commission din a ni. Civil service leh army-ah Mizo tling an tlem tâk avangin hemi kawnga tuite tan MYC kaltlangin coaching class buatsaih a ni," a ti.

Kumina HSLC exam-ah khan St.Paul's HSS hian pakhatna, pahnihna, palina, parukna leh pariatna an hauh a; mathematics leh science subject-ah topper an nei a, zirlai exam 370-te an pass vek a ni.

HSSLC Science-ah pakhatna, pahnihna, pa­thumna, palina, pangana, pasarihna leh pariatna an neih bakah, computer science, physics, biology, bussiness studies leh accountancy subject-ah topper an nei a; Commerce-ah pahnihna an nei bawk.