Mizoram Bru raltlante Mizoram páwna Vote thlak Joint NGO-in dodal an tum

YMA, MHIP, MUP, MZP leh MSU-te telna NGO Coordination Committee (Joint NGO) hruaitute chuan, kumina Mizoram Assembly inthlanpui awm turah Mizoram aṭanga chhuak Bru, Tripura-a awmte chu an awmna camp-ah vote thlaktir an remti dawn lo tih an sawi a; vote thlâktir tumna a awm a nih chuan na taka an dodal tur thu an puang.

Joint NGO-te hian nimin khan Central YMA Committee Room-ah journalist-te léngah sáwmin, Mizoram aṭanga Bru raltlante chungchanga an hmalaknate an hrilhfiah a; kumin May thla tawpa Joint NGO hruaitute'n New Delhi-ah Election Commission of India (ECI) hotute leh Ministry of Home Affairs (MHA) hotute hnena memorandum/ultimatum an thehluh chungchang an sawifiah a ni.

ECI leh MHA hotute dâwr dan an sawifiah bakah, Joint NGO-a tel pawl panga hruaitute'n thu an sawi a; CYMA president leh Joint NGO chairman Vanlalruata, MZP president L Ramdinliana Renthlei, MSU president RB Lalmalsawma, MUP president RK Thanga leh MHIP finance secretary Dr Lalthan­puii Hnamte ten thu an sawi.

CYMA president leh Joint NGO chairman Vanlalruata chuan, Mizoram Bru, Tripura camp-a awm mekte chu an awmnaah vote thlaktir leh tumna a awm nia an hriat rûk thu sawiin, "Kan inpuah­chah ṭhat a ngai dawn khawp mai. Mizo mipui kan ṭan rual a ngai dawn a, a nih nih kan huam a ngai tain a lang," a ti.

Vanlalruata chuan, March 19, 2018-a Guwahati-a Joint Moni­toring Group meeting-ah Mizoram aṭanga tel Central YMA Assistant Secretary-in Bru pawl aiawha tel chu hmachhanah Mizorama kîr an duh leh duh loh a zawt a, Bru pawl aiawh chuan, "Kan kir dawn lo," tiin a chhang niin a sawi.

Joint NGO Chairman chuan, Bru pawlte'n Supreme Court-ah zualko a, MHA, Tripura leh Mizoram sorkar a khinnaah Joint NGO-te pawh an bâng bik lo tih sawiin, "He Court case avang hian Rs. 4,70,000 chuang kan sêng tawh," a ti a; Bru vanga Court thubuaia cheng tam tak an séng chu ná an tih thu a sawi a ni.

CYMA vice president R Lal­ngheta chuan, political party tinte chu Bru camp-a vote îta phe phe lo tura an duh thu a sawi a, "Bru-te'n Mizoram pâwna vote an thlak loh nan engti kawng zawng pawhin ṭan kan la dawn a ni," a ti.

Bru chungchanga thil thleng leh hmalakna
# Date Thil thleng & Hmalakna
1. Oct. 21, 1997 Lalzawmliana, Game Watcher, Forest department chu Bru hel nia hriatte'n an kap hlum. He thil thleng kaihhnawihah Bru eng emaw zat Tripura-ah an tlanchhia.
2. 1998 Mizoramah Assembly inthlan a ni a, Tripura-a awm Mizoram bru-te'n vote an thlak lo.
3. 1999 Mizoramah Lok Sabha inthlan a ni a, Tripura-a awm Mizoram bru-te'n vote an thlak lo.
4. 1999 Tripura-a awm Bru-te'n Mizorama inthlana vote an thlak theih nana Delhi High Court-ah an zualko, Akhil Bharatiya Adivasi Kalyan ten an thláwp.
5. 2003 Tripura-a Mizoram Bru aiawh pawlin Jammu & Kashmir aṭanga Kashmiri pundit tlanchhiate dinhmun an dil angin, Tripura-a Bru 4,205 chu an awmna hmasa MLA bialaa electoral roll-ah thun an ni.
6. 2003 Mizoram Assembly inhthlanpuiah Bru tlanchhiate tan Mizotamah special polling station siam a ni a, an kalna tur motor ruahman a ni. Mahse, vote 11.8% chiah a tla.
7. 2004 Election Commission of India-in Tripura-a Mizoram Bru-te 'Ordinary resident of Mizoram' ah a puang. Lok Sabha inthlanah Tripura-a an awmna camp parukah postal ballot 3,620 thawn a ni. Postal ballot-ah thil fel lo a awm avangin postal ballot-te chu pawm a ni lo.
8. 2006 Bru National Liberation Front (BNLF) mi 804-te Mizoram sorkarah an inpe, sorkarin chhawmdawlna ṭha tak a pe.
9. 2008 Mizoram Assembly inthlanah Tripura-a Bru camp parukah vote 78.55% a tla.
10. Nov 13, 2013 Zarzokima, Bungṭhuam, Mamit district chu an khaw dáiah Bru hel nia hriatte'n an kâp hlum. Hei vang hian Bru eng emaw zatin Mizoram an chhuahsan leh.
11. 2010-2014 Bru raltlante lâk lêt (repatriation) ruahmanna vawi 6 a awm a, chhungkaw 1,600 chuang anmahni thuin Mizoramah an let.
12. Nov. 2, 2013 ECI-in Representation of People Act, 1951 Section 60(C) tlawhchanin Bru-te chu 'Notified class of persons to give their vote by postal ballot' ah a puang a, Mizoram Assembly inthlanah vote thlak a phalsak.
13. March 3, 2014 Mizoram Chief Minister-in Tripura-a Bru-te Kashmiri pundit anga special class of voter dinhmun pek vanga lungawi lohna ECI hnenah a thlen.
14. March 24, 2014 Bru raltlante'n an awmna camp, Tripura-a vote an thlak loh nan Joint NGO-in Protest Day an huaihawt a, kawngte zawh a ni. Political party tinin Tripuera-a vote thlaktir lo tura ngenna an ziak vek.
15. April 7-8, 2014 Bru raltlante'n an awmna camp, Tripura-a vote thlaktir duh lohzia lantir nan Joint NGO-in total bandh an huaihawt. MLA leh MP inthlanpui awm leh turah Mizoram pawnah Bru-te'n vote an thlak loh nan hma an lak tur thu ECI-in ziakin a tichhuak a, Joint NGO pawhin total bandh an titawp.
16. Nov. 16-20, 2015 Mizorama all NGO & all party aiawh mi 10-te'n New Delhi-ah Home minister of state Kiren Rijiju leh ECI hotute an hmu a, Tripura camp aṭanga Mizorama kîr duh lo Bru-te Mizoram Electoral Roll aṭanga paioh tur leh an camp titawp tura ngenna an thlen.
17. 2015 A vawi 7 nan Bru lak let tum a ni a, Mizorama kîr duh an awm lo.
18. Feb. 14, 2015 Mizoram Bru Displaced People Forum (MBDPF)-in Union Home minister Rajnath Singh hnenah ziakin Mizorama an kîr duh loh thu te, Mizoram mipui an hêkna leh an sahimna ngaihtuahsak tura ngenna an thlen.
19. July 15, 2015 Election Officer, Mamit chhannaa a lan danin, Tripura-a Bru cam parukah Mizorama vote nei mi 11,243 an awm a, kum 2003-a voter zat 4,265 aṭangin 163.6% in an pung.
20. Sept.11, 2015 ECI thupek angin, Mizoram Chief Electoral Officer-in Bru camp parukah Electoral Roll Special Summary Revision nei turin hriattirna a tichhuak.
21. Nov. 9, 2015 Mamit DC Office aṭanga Bru camp paruka Electoral Roll Special Summary Revision ti tura official kal turte NGO-te'n an dang.
22. 2016 Bru camp paruk - Kaskau, Khakchangpara, Hamsapara, Asapara, Hazacherra leh Naisingpara-ahte Bru chhugnkua 3,500 vel awm tura beisei a nih laiin, Mamit DC Office-in an enfiahnaah chhungkaw 5,407 an awm.
23. Feb 6, 2017 Mizorama Bru lak let dan tur ruahmanna leh hamṭhatna dawn turah lungawi loin MBDPF-te Supreme Court-ah an zualko, hei vang hian Supreme Court-in Bru lak let tumna a chawlhtir (stay). Court hian Home Ministry, Mizoram sorkar leh Tripura sorkarte insawifiah turin a hriattir a, February 25-ah chhanna thehluh a ni.
24. March 19, 2018 Guwahati-a Joint Monitoring Group meeting-ah Bru pawl aiawhin Mizorama an kîr dawn loh thu a sawi.