Financial Literacy Week hman ṭan a ni Cash transacion tihtawp a ṭul - Finance Secy

Reserve Bank of India (RBI) bultumin nimin khan Aijal Club-ah sum enkawl leh hman dan inzirtirna chawlhkar, 'Financial Literacy Week' hawnna hun hman a ni a; khuallian Finance secretary Lalnunmawia Chuau­ngo chuan, sorkar hnuaia indâwr­naah sum faia inpek (cash tran­saction) tihtawp a ṭul thu a sawi.

Lalnunmawia Chuaungo chuan, Financial Literacy chu Mizoram mipuiin an mamawh hlea a hriat thu sawiin, "Mizo­rama ka rawn awm tirh khan sorkarah pawh financial tran­saction lamah kan sang lo tih ka hmu. Sum faia sum inpek a tam a, hei hi a him lo a, tihtawp a ngai. Cash transaction hi tihbo ṭul ka ti a, chumi atan chuan mipui pawh an lo inrin ve a ṭul," a ti.

Finance Secretary chuan, bank hman ṭangkai a pawimawh thu sawiin, "Ina sum kawl ṭeuh hi rûkrù, chhiatrupna leh thil dangahte a him loh bakah, sum faia kan kawl ṭeuh hian sum hlutna a tlakhniam zel avangin kan hloh a ni. Zinnaa sum faia ken vakte hi a him lo," a ti a; bank-a sum dah chu a pun zel avangin a hlâwk bakah, a him thu a sawi.

Mizorama sumdawnnaah sum faia indàwr ṭhin chu thlak ṭul a tih thu sawiin Lalnunmawia chuan, "Credit card hmangin indawr ila, a awlsam bakah a him a ni. Sumdawng dawr neite pawhin credit card hman uar a nih theihna atan Point of Sale Machine an neih a ṭul, thil to tak pawh a ni lo. Pawisa faia hmanga indawr hi kawng hrang hranga tihtawp a ngai," a ti.

Aizawla RBI general manager Mary L Deng chuan, sum enkawl dan hriat chian chu thil pawimawh tak, sum hman dan leh khâwl dan hlâwk zawk hmuhfiahtirtu leh sum kaihhnawih thila thutlukna dik min siamtirtu a nih thu a sawi.

Financial Literacy Week hian June 8 thleng a awh dawn a, hemi chhung hian bank hnathawkte'n sum enkawl chungchang mipui zirtirin an feh chhuak dawn a ni.

Mizoramah Financial Li­teracy beihpui thlak turin State Bank of India (SBI)-in Financial Literacy Centre (FLC) pariat an enkawl a, Mizoram Cooperative Apex Bank-in FLC pakua an enkawl mek. RBI hian kuminah tun thla thlengin Mizoramah zirna-in 12 leh thingtlang khaw parukah financial literacy campaign an nei tawh a ni.