Serchhipah hmasawnna hnathawh thlir lêt

Serchhip District De­velopment Coor­dina­tion & Monitoring Committee chu nimin khan an chairman CL Ruala, Lok Sabha MP leh co-chairman Ronald Sapa Tlau, Rajya Sabha MP hoin an ṭhu a; sorkar laipui scheme hnuaia hmasawnna hna thawhte an thlir lêt.

Meeting-a tarlan danin, PMGSY hnuaia thing­tlang khaw kar kawng laih mek Chhing­chhip-Thentlang chu 97%, Hmunṭha-Khawbel chu 73%, Chhingchhip-Hualtu chu 78%, Chhing­chhip-Hmunṭha chu 88%, East Lungdar-Sailulak chu 99%, Serchhip-Hriang­tlang chu 6% leh Chekâwn-Lungchhuan chu 5% thawh zawh a ni tawh.

National Rural Drin­king Water Programme (NRDWP) hnuaiah PHE-in khaw pasarihah tui lâk hna a thawk mek a, chu'ng zinga Khawlailung WSS leh Tuichang WSS chu zawh tawh niin Lung­kawlh, Thinglian, Neihloh, Hriangtlang leh Baktawng te thawh mek a ni.

SSA Missions hnuaiah 2018-19 academic ses­sion-ah primary school naupang 1,629 leh middle school naupang 3,047-te zirlaibu a thlawna pek an ni a, uniform grant Rs. 400 ṭheuh naupang 2,067 hnenah pek a ni bawk.

MGNREGS hnuaiah kum 2017-18 chhungin ni 52 inhlawhna Ministry of Rural Development-in a pawmpui a, mahse, an hnathawh ṭhat vangin ni 24 inhlawhna pek belh a ni.