June 4 zana hmun hniha chhiatna thlengah mi 21-in nunna an chan
Thawhṭanni tlai dar 6:30 vel khan Lunglawn veng chuan hnuai lam, khelmual thlanga H Vanlalpeka (30) s/o Aipianga te in, chhâwng hnih, chhungkaw pahnih luah lai chu a chhak lama leiminin a hnâwl.
In hi a ban leh a beam RCC, a chhuat thingphel, a chung ber RCC slab, a bang tile a ni. Lei min lai hian chhungkaw pahnihte chenna inah mi 14 an awm a, chu'ngte chu in chim hian a chimpui vek a ni.
In chhawng chung zawkah Vanlal-peka chhungkua an khawsa a, a hnuai zawkah Thatlina (Vanlalpeka puzawn) te chhungkua an khawsa thung.
Chhiatna thlen veleh khawtlang mipuiin chhanchhuah hna an thawk nghal a, Lunglei khawpuia veng hrang hranga tlawmngaite an thawh chhuah bakah, State Disaster Response Force mite'n chhanchhuah hna an thawk.
Thawhṭanni zan dar 9 hmain in neitu H Vanlalpeka (30), a fate pahnih HC Zonunmawii (9) leh HC Malsawmkima (10) te leh, PC Lalduhsaka (17) te chu dama chhanchhuah an ni a, damdawi-in panpui nghal an ni.
Zan dar 12 hmain Thatlina (67) h/o Darpawngi, Lalchawiliani (29) w/o Vanlalpeka, Cindy Lalhlunmawii (4), Lalrammawii (13), Peter Lalkrosschhuanga (7) leh Laldinpari (37)-te ruang lak chhuah a ni.
Zing khawvar hmain Vanlalpeka pizawn Darpawngi (66) w/o Thatlina, Remlalfamkima (14) leh Christina Lalnunhrili (10)-te ruang lak chhuah leh a ni. Nimin chawhma dar 11 vel khan HC Aipianga (83) f/o Vanlalpeka, ruang lak chhuah leh a ni bawk.
YMA sub-headquarters Lunglei secretary Ngurthansanga Sailo hnen aṭanga thu dawn danin, Vanlalpeka pa Aipianga, a nupui Lalchawiliani leh a fanu Cindy Lalhlunmawii te ruang hi Lunglawna an chhungte inah lak niin, nimin khan vui nghal a ni.
Vanlalpeka puzawn Thatlina te chhungkua bika thi panga - Thatlina, Darpawngi, Laldinpari, Remlalfamkima leh Peter Lalkross-chhuanga te ruang chu Bungtlang South, Lawngtlai district-ah lak a ni.
Thatlina te chhungkaw zinga khawsa ve tho - Lalrammawii leh Christina Lalnunhrili te unau, Arsiropuia fate chu Chawnhù, Lawngtlaiah lak a ni thung.
Nimin khan Lunglei khawpuia YMA branch tin aṭangin ruang zawng tur te, thlan lai tur te, thingpui luma sem turtein mi ṭhahnem tak an thawk chhuak.
Hetihlai hian Pangzawl bula bus chesuala thi, chhim lam panpui turte chu Lunglei Sub-Hqrs. YMA bultumin Hrangchalkawnah mi eng emaw zatin an lo hmuak a, an pualin inkhawm tawi buatsaih a ni.
Lunglawna chhiatna thlenna hmun hi MLA pahnih Joseph Lalhimpuia leh Chalrosanga Ralte te, Lunglei DC leh SP, Lunglei Additional SP leh sorkar lam hotute'n an pan nghal a; Joseph Lalhimpuia chuan, chhiat tâwkte chhawmdawlna kawngah sorkarin a tih theih ang ang a tih dawn thu a sawi.
Nimin khan Disaster Management & Rehabilitation minister C Ngunlianchunga, Mizoram MP pahnih CL Ruala leh Ronald Sapa Tlau, ZPM chief minister candidate Lalduhoma ten chhiatna thlenna hmun hi a tlawh bawk a; chhiatna tâwkte leh khawtlang tan ṭanpuina an pe hlawm a ni.
Lunglawn in chima thite
1. HC Aipianga (83) f/o H Vanlalpeka
2. Lalchawiliani (29) w/o H Vanlalpeka
3. Peter Lalkrosschhuanga (7) s/o H Vanlalpeka
4. Thatlina (67) f/o Lalchawiliani
5. Darpawngi (66) m/o Lalchawiliani
6. Laldinpari (37) d/o Thatlina
7. Remlalfamkima (14) s/o Laldinpari
8. Cindy Lalhlunmawii (4) d/o Laldinpari
9. Lalrammawii (13) d/o Arsiropuia, Chawnhù
10. Christina Lalnunhrili (10) d/o Arsiropuia, Chawnhù