Bawngkawn Brigade rama mimal ram Tihtawpna tur Cabinet-in a pawm

June 4, Thawhṭan­nia chief minister Lal Thanhawla hoa Council of Minister-te Chief Sec­retary pisa conference hall-a ṭhukhawm chuan, Bawngkawn Brigade rama mimal ram (residential land certifcate) tihtawp (cancel)-na tur an pawm.

Cabinet meeting-ah hian Land Revenue & Settlement (LRS) departent agenda 'Release of Phase-II area Bawng­kawn Brigade Area' leh 'Cancellation of Passes and Residential Land Certifcate within Phase-I Area of Bawngkawn Bri­gade Area' chu sawiho a nih hnuah pawm a ni.

Thu dawn danin, LRS department chuan Bawng­kawn Brigade ram chu Phase-I leh Phase-II ah an ṭhen a; Phase-I chu J Thankima College awmna chhehvel niin, Phase-II chu Brigade Field chhehvel a ni.

Phase-I huam chhung­ah hian mimal ram, Re­sidential Land Certi­ficate nei mi 90 chuang an awm a; Cabinet-in a pass tâk hi mi 90 chuangte residential land certifcate cancel-na tur a ni. Phase-II huam chhung erawh dah zalen tawp a ni dawn thung.

Cabinet hian residen­tial land certifcate cancel hi rem ti mah se, LRS department chuan Law & Judicial department ráwn chhungin hma a la dawn nia thu dawn a ni.

Council of Minis­ter chuan, GAD agenda 'Record and Recommen­dation of the District Re-organisation Committee' pawh an ngaihtuah a, thu­tlukna erawh an siam lo. Thu dawn danin, meeting-ah hian district pathum puan tawh tihpuitlin lam aiin, sub-division awm sa tihchangtlun lam sawiho ber zawk a ni.

Cabinet meeting-ah hian agenda 45 leh additional agenda 12 a lut a, zan dar 10 thleng meeting niin, an ngaih­tuah hman lohte chu kar leh lama ngaihtuah turin an dah a ni.