CM-in Tut lei a hawng

PWD-in Tut lei (Pre-Stressed Concrete Girder Bridge) an dawh thar chu, nimin khan chief minister Lal Thanhawla'n a hawng.

Chief Minister chuan inkalpawhna siam chung­changah ramin chak zawka hma a sawn theih nan a thawktu depart­ment-in hma an la ṭhin tih sawiin, "Chutihrual chuan department ta ni loin mipui ta a nih avangin mipuiin neitu rilru an put a ṭul. Khuarel chhiatna chu dan zawh rual loh ni mah se, mi ṭhenkhat ngaihtuah thui tawk loh avanga lei dawh kilhna hmanrua

ṭhenkhat lo ruk bo avang leh leiin a dawl chin bak a rit phura lirtheiin an zawh avanga chhiatna thleng thei a nih avangin kan fimkhur tlan a ṭul," a ti.

Inkhawma tarlan a nih danin, Tut lei hi metre 11.25 a zau, metre 128 a thui a ni a, December 31, 2016 khan lei hi dawh zawh a ni a, hna zawh thlenga senso zat chu cheng vbc. 15.50 a ni.

Lei dawh hna hi December 2016 a zawh ni mah se, MoRTH duh dan angin a design load a zo dawn nge dawn lo tih chu enfiah (load test) a ngai a, June 2017 khan load test ti turin tender hmangin Mechfab Engi­nee­ring Industries Pvt. Ltd., Guwahati thlan an ni a, anni hian load test hi ti nghal in a test result hu August 2017 khan an thehlut a ni.

Load test dan kal­phung zirchian a nih hnu­ah dik tawk loa hriat a nih avangin test nawn leh tura hriattir an ni a, test result chu February 2018 khan an theh lut leh a, hei vang lei hi nimin khan hawn chauh a ni.