Sorkar leh pawl pali-in chhiat tâwkte tawrhpui

Chief minister Lal Thanhawla leh Home minister R Lalzirliana chuan, Lunglei Lunglawna leiminin in a hnâwl vanga thite leh Pangzawl dáia Siaha bus chesual vanga thi chhungte leh hliamte sorkarin an tawrhpui tak zet thu an sawi.

Central YMA, MNF, Zoram Peoples Movement leh PRISM party-te pawhin nimin khan a hrang ṭheuha thuchhuah siamin, June 4, Thawhṭanni zana Lunglawna leimin vanga chhiatna thleng leh Pangzawl dáia Siaha bus chetsualna chu pawi an tih thu leh, mitthi chhungte an lainat thu an tarlang.

Chief Minister chuan thuchah ti chhuakin, chhiatna thleng chuan tilung­ngaiin a nghawng na hle tih sawiin, "Chhiat tawk chhungkuate ka tawrhpui takzet . He vanduaina rapthlak tak an chunga lo thleng hi hriatthiam har hle mahse Pathian chakna ring chungin chhel taka tuar fan fan turin ka chhiat tawkte ka chah a ni,” a ti.

Lal Thanhawla chuan DMR Minister C Ngunlianchunga bakah MLA dang pahnih Joseph Lalhimpuia leh Chalrosanga Ralte te'n chhiatna thlenna hmun hnihte hi an tlawh nghal thu a sawi.

R Lalzirliana chuan, Thawhṭanni zana Cabinet meeting an neih laiin Lunglawna vanduaina thleng an hriat thu sawiin, "Chief Minister-in a tawrh­pui thu a sawi nghal a, meeting-a tel dangte pawhin kan tawrhpui tak zet a ni. Zanlaiah Pangzawl daiah chetsualna a thlen thu kan hre leh bawk. Zoramin chhiatna rapthlak a tâwk hi a vanduai­thlak a, thin a ṭháwng tak zet a ni," a ti.

Home Minister sawi danin, vanduaina vanga thite chu dan ding lai angin Mizoram sorkarin mi pakhat Rs. 4,00,000 zelin a rál dawn a ni.

Central YMA chuan, mitthi chhungte leh hliam tuar chhungte thinlung taka an tawrhpui thu sawiin, "Hliamte dam leh thuai turin duhsakna kan hlan a ni," an ti a; chhiatna nasa tak a thlena tlawmngaia ṭanpui ngaite ṭanpui tura YMA member-te inpekna chu ropui an tih thu sawiin, Mizo tlawmngaihna chhawm nung zel turin YMA member-te an ngen.

MNF chuan, Thawhṭanni zana Mizoram chhim lam hmun pahniha chhiatna thleng chu pawi an tih tak zet thu sawiin, "Lusûn chhungte thinlung takin kan tawrh­pui a, hliamte ṭha chhuak thuai turin duhsakna kan hlan a ni. Hetiang chhiatna rapthlak a thlen chánga Mizo tlawmngaihna ropui a pár chhuak ṭhin hi lawmawm kan ti tak zet a ni," an ti a; chhiat tâwkte chu a remchan dan leh a theih ang anga ṭanpui turin sorkar an ngen a ni.

Ṭangrual pawl ZPM chuan, "Lung­lawn leimin leh Pángzawl daia Siaha night bus accident vanga nunna tam tak chân a ni hi pawi kan tiin, kan tawrhpui tak zet a. Lusûn chhungte Pathian awmpuina leh thlamuanna kan duhsakin kan ngenpui a ni. Vanduaina tâwkte ṭanpuitu leh buaipuitu zawng zawngte fakawm kan ti tak zet a ni," an ti a; chhiatna thleng vangin ZPM-in Lungleia programme an neih turte an tihdanglam nghal thu an tarlang.

PRISM party chuan, chhiatna thleng­a hliam leh nunna chánte rilru leh thinlung taka an tawrhpui thu sawiin, "Nunna hlu tak chántu chhungkaw tan kan ṭawngṭai a ni," an ti a; chhiatna tawkte chu a remchan leh theih ang anga thuam hlawm turin sorkar an ngen a ni.