World Environment Day hman a ni

Nimin kha World Environment Day a ni a, Mizoram hmun ṭhenkhat­ah hman a ni. Kumina thupui chu 'Beat plastic pollution' tih a ni.

Mizoram University-a Department of Environmental Science chuan World Environment Day hi MZU campus-ah an hmang a; a hawnna inkhawm, Environmental Science head of department Prof. Lalnun­tluanga kaihhruaiah Dr John Zothanzama'n thupui a sawi.

Inkhawm zawhah MZU Environmental Science department-a zirtirtu leh zirlaite;n MZU campus an thian fai a, thing an phun nghal. Plastic lam chi reng reng hmang lo tura intiamna an chham rual bawk.

Zoram Entu Pawl (ZEP) leh Caritas India ṭangkawp huaihawtin Mount Hermon English Medium School, Hmuifangah World Environment Day hman a ni bawk a; Hmuifanga sikul pathum Mt. Hermon School, Hmuifang Primary School leh Hmuifang Middle School zirtirtute leh zirlaite an tel.

A hawnna inkhawm hman zawhah Mount Hermon School campus chhungah thing ṭiak eng emaw zat an phun nghal a ni.

Environment, Forest and Climate Change department leh Nehru Yuva Kendra ṭangkawp pawhin HATIM, Lungleiah an hmang a; NYK district youth coordinator Zomuana'n a kai­hruai.

Lunglei DFO Dr C Vidhyasagar chuan thu sawiin, plastic aṭanga thil siam chhuahte khawvel hmun hrang hrangah hman nasat a nih thu a sawi a, "Plastic-te hi bawlhlawh buaipuiawm ber a ni thung a, a ṭawih har em avangin hnawksak a tling a ni," a ti.

HATIM-a World Environment Day hmannaah hian Lunglei khawpuia YMA branch hrang hrang leh college hrang hrang aṭangin mi eng emaw zat an tel a ni.