KHAWTHLIR

NEC-in NEDP tha ti
North Eastern Council (NEC) chuan, Mizoram sorkar policy NEDP chu ṭha a tih avangin India hmarchhak state dangte pawh NEDP ang policy nei ve turin thurâwn a pe. NEC hian tun hnai khan hmarchhak state Chief Secretary-te hnenah ṭheuh lehkha a thawn a ni.

Thisen pe
Reiek Branch YMA chuan, kumina YMA Day lo thleng tur pualin nimin khan an khaw community hall-ah blood donation camp an huaihawt a, Aizawl Civil Hospital tan thisen unit 65 an pe a, a petute mipa 58 leh meichhia pasarih an ni.

Leiminin in hnâwl
June 4, Thawhṭanni tlai khan ruahsur nasa vangin Champhai Buangtlang, Kahrawt venga Vohbika-te in chu leiminin a hnâwl a, thi leh hliam an awm lo. Nimin khan khawtlangin in chhia senghawi hna an thawk a ni.

Zu sakna tichhia
Excise & Narcotic enforcement staff-te chuan, nimin khan Phunchawng leh Rangvamual ram-hnuaiah beihpui an thlak a, zu sakna hmun eng emaw zat hmu chhuakin, an tichhe nghal. Rakzu litre 100, zu bilh lai ṭin 670 leh zu sakna bél 24 an man tel bawk.

ASHA training
Siaha district-a ASHA-te tan nimin khan MADC Forest Hall-ah training buatsaih a ni a, National Health Mission director Dr Lalrozama'n a hmanpui. ASHA-te chu naute him taka nei tura inpuahchah dan tur te, nau paite enkawl dante leh an hnathawhnaa hriat tur pawimawhte zirtir an ni a; vawiinah chhunzawm a ni ang.

Kawng laih chah phal a ni lo
PWD Aizawl Road South Division-a executive engineer David Sapzova chuan hriattirna chhuahin, tui pipe phûmna atana khawpui chhunga kawngpui laih chah ṭhin chu PWD Aizawl Road South Division chhungah kumin bik atan June 15, 2018 hnu lamah phal a nih tawh dawn loh thu a tarlang.