Mizoramah nausen thi a tlêm ber

Sorkar laipui hnuaia Sample Registration System (SRS)-in October 2021 Bulletin a tihchhuahah, Mizoram chu kum 2019 chhunga India rama nausen kum khat hnuai lam thi tehna, infant mortality rate (IMR) hniam berna state a ni tih tarlan a ni.

Sorkar thuchhuahin October 2021-a tihchhuah SRS Bulletin-a tarlan tarlan chhàwn danin, kum 2019 chhunga Mizoram IMR chu 3 a ni a, nau piang 1,000 zelah pathum an thi tihna a ni. Hetih lai hian, Nagaland IMR pawh 3 niin, Mizoram nen IMR hniamna ber a ni.

Pahnihna chu Sikkim niin, IMR chu 5 a ni a; Kerala state IMR chu 6 niin, pathumna a ni. Hetih lai hian, India ram pum IMR chu 30 a ni thung.

Sorkar thuchhuah chuan, IMR-a Mizoram dinhmun a ṭhat chhan chu mipuiin mithiamte thusawi an awih ṭhat vang leh ṭanho ṭhat vang a nih thu a tarlang a, "Health & Family Welfare department-a thawktu te, a fawng vuantu National Health Mission hnuaia Reproductive and Child Health (RCH) leh programme hrang hranga thawktute inpekna thûk tak avang te, Social Welfare, Women and Child Development, School Education, Rural Development, Public Health Engineering department-te nena thawhho ṭhat vangte a ni," a ti.