India-in Pakistan a hneh ní lawm a ni

Kum 1971-a India leh Pakistan indonaa India-in hnehna a channa ní, Vijay Diwas kum 50-na (Swarnim Vijay Vaarsh) chu October 30, Inrinni khan Lammual leh Mizoram hmun hrang hrangah lawm a ni a; hemi puala hneh­na meichher Swarnim Vijay Mashaal/Golden Victory Torch chu India ram hmun hrang hrang tlawhpui a nih hnuah Mizoramah luhpui a ni.

December 16, 2020-a Vijay Diwas-ah prime minister Narendra Modi chuan Delhi-a National War Memorial-a eternal flame-ah Golden Victory Torch hi a chhí a, chumi hnuah India ram state hrang hrangah kalpui a ni. Mizo­ramah chuan Vairengte aṭangin Assam Rifles-in an lo dawngsawng a, Aizawl panpuiin an rawn thlen a ni.

Lammuala Swarnim Vijay Vaarsh lawmna hi Chief minister Zoramthanga'n a hmanpui a; Chief Minister chuan, "Sipai huaisen tak tak, nunna chán tate inpekna a hlu tak zet. Dam chhuaka vawiin thlenga hun min la hmanpui thei war veteran-te chungah lawmthu ka sawi a ni," a ti a; tunlai khaw­velah India sipaite chêt chhuah­na tur indona a thlen tawh loh a beisei thu a sawi.

Assam Rifles deputy inspector general (DIG) Brig. Digvijay Singh pawhin thu sawiin, India leh Pakistan indonaa tel ve Mizo sipai tam tak an awm leh a lawmnaa an telpui thei chu lawmawm a tih thu a sawi. Kum 1971 indonaa tel Mizo ex-servicemen mi 12 hnenah Chief Minister chuan chawimawina a hlan a ni.