Sports dept.-in thumum an neih loh vangin SDSC-in football stadium an enkawl dawn

Serchhip Sports Complex-a football stadium enkawltu ruat chungchangah Sports & Youth Services department-in tun thlenga thu mûm a neih theih loh avang leh enkawltu a dah loh avangin Serchhip District Sports Committee (SDSC) chuan vawiin, November 1, 2021 aṭangin stadium enkawl hna chu anmahni thuin an kutah an dah dawn tih October 30, Inrinni khan an puang.

SDSC chuan, Serchhip football stadium chu UDPA department hnuaiah sak niin, August 30, 2021-ah hawn a nih thu an tarlang a; a hawn ní-ah SYS department kuta hlan a ni a, SYS kuta a awm hnuah thla hnih chhung enkawltu SYS-in a la dah loh avangin November 1, 2021 aṭangin an kutken tawh dawn tih an tarlang a, stadium hman dan tur an duang nghal.

October 30, Inrinnia thuthar thehdarhtute nen an inkawmnaah SDSC chairman K Tlangthanmawia chuan, Serchhip football stadium-ah enkawltu mumal an awm loh avangin zing leh tlaiah infiammi leh infiammi ni lote pawhin intàwllèn nan an hmang nasa tih a sawi.

SDSC Chairman chuan, enkawltu mumal tak dah turin SYS minister Robert Romawia Royte chu September 3, 2021 khan an ngen tawh tih sawiin, Sports Minister chuan thla khat chhungin enkawltu mumal dah a nih tur thu a lo hrilh tih a sawi a; mahse, thla hnih dáwn a ral hnu pawha enkawltu dah a nih loh avang leh stadium chu humhalh a ṭul si avangin SDSC chuan enkawl turin an kutzálah an dah ta tih a sawi bawk.

Serchhip Sports Stadium sakna atan sorkar laipui aṭangin cheng vbc. 15.25 hmuh a ni a, football ground sira synthetic athletic track phahna atan state sorkar aṭangin cheng vbc. 3.30 hmuh a ni.