Aizawlah Unity Run buatsaih a ni

Mizoram Police-a Aizawl District Executive Force (DEF) chuan Rashtriya Ekta Diwas (National Unity Day) pualin October 30, Inrinni khan Aizawlah Unity Run an buatsaih a, director general of police SBK Singh-a'n a hmanpui.

DGP SBK Singh chuan, police-te chu an taksa hriselna vawn uluk a ṭul thu sawiin, "Ram tana kan rawngbawlnaah leh ni tina kan hnathawhnaahte inpumkhatna nei tur chuan mahni inpekna aṭangin kan ṭan tur a ni," a ti a; hriselna hlutzia hriaa insawizawi ṭhin turin a chah.

Aizawl SP C Lalruaia chuan Unity Run buatsaih chhan a sawifiah a; Rashtriya Ekta Diwas (National Unity Day) chu kum tin October 31-ah hman ṭhin ni mah se, kuminah chuan Pathianni a nih avangin Police chuan October 30-ah an hmang tih a sawi.

National Unity Run-ah hian police 150 vel an tlân a, Sikulpuikawn aṭanga tlante DGP SBK Singh-a'n a vailiam a, Aizawl Police Station kawt aṭanga tlante AIGP (Hqrs.) Zosangliana'n a vailiam. Hmun hnih aṭanga tlante hi Aizawl SP Office kawtah intâwk khawmin, Aizawl SP C Lalruaia kaihhruaiin Rashtriya Ekta Diwas pualin hun hman a ni.