RT-PCR bunna tur hmun peih

Lungleia RT-PCR khawl bun lailâwkna atana Tourist Lodge, Zotlang chei ṭhat chu hna thawh ṭan aṭanga ni 40 hnu, October 30, Inrinni khan peih a ni. Hetih lai hian, Lungleia pawl hrang hrangte chuan RT-PCR lab. bunna tura mamawhte sorkarin a bawhzui dan chu lungawi thlak loh an tih thu an sawi.

RT-PCR khawl bunna tur Tourist Lodge chei ṭhat hna hi September 21, 2021-ah thawh ṭan a ni a, pindan awm sa ṭhenkhat tichhiain, laboratory-in a mamawh tur room hrang hrangte duan thar a nih bakah, in chhung leh páwn rawng hnawih ṭhat a ni. Electric wiring pawh a thara ruahman a ni a, hna thawh ṭan aṭanga a ni 40 naah civil work zawh a ni.

Hetih lai hian, RT-PCR laboratory bun ṭan hun tur hriat a la ni lo a, laboratory atana ṭul air conditioner leh generator-te pawh dah a la ni lo.

Tourist Lodge-a hnathawh zawh tawh tlawhtu Lungleia tlawmngai pawl hrang hrang hruaitute chuan, a hmunhma chei (civil work) chu ṭha an tih thu an sawi a; chutih rualin, RT-PCR laboratory mamawh bungrua leh hmanraw hrang hrang ngaihtuah kawnga sorkar hmalakna chu lungawi thlak loh an tih thu an sawi.

Thuthar thehdarhtute zawhna chhangin Lunglei Sub. Hqrs. YMA secretary Zothanzuala Hnamte chuan tun dinhmunah khawl leh hmanraw dang engmah dah ala ni lo leh thla thar aṭanga hri kai leh kai lo test kalpui theih a nih an beisei tawh laia hman theih a la ni lo chu pawi an tih thu a sawi.

Zothanzuala chuan Covid-19 hri kai leh kai lo endik chungchangah sorkar thuchhuah thar berin hri kai nena inhnimhnai zual, kaina chance sang high risk contact-te chu RT-PCR emaw Truenat emaw hmanga test tur a nih laiin Lungleiah chuan RAT hmangin test an la nih thu sawiin, "Mipui tan a hlauhawmin a thlamuan thlak loh. RT-PCR khawl chu rang taka hman a nih theih nan a theih ang anga hmalak kan tum," a ti.

Lunglei Sub. Hqrs. YMA hian September 20, 2021 khan 'RT-PCR khawl hi sorkarin October 2021 chhung ngeia hman theih tura bun fel turin YMA chuan kan beiseiin kan phut tlat a ni' tiin thuchhuah an siam a ni.

He thuchhuah bawhzui hian September 22-a Lungleia tlawmngai pawl hrang hrang in hmukhawmte chuan RT-PCR lab. dinna chungchanga YMA Sub Hqrs Lunglei hmalakna turah ṭanho zel nise, an ti.