KHAWTHLIR

Thisen pe
Inrinni khan Aizawl Civil Hospital tan KṬP, Republic Vengthlang chuan an kohhran hall-ah thisen unit 65 an pe a, petute mipa 50 leh hmeichhia 15 an ni a; KṬP, Chaltlang Lily Veng Branch-in blood Bank-ah unit 15 an pek bakah, mimala a thlawna pe mi 12 an awm. KṬP, Chawnpui Branch-in an din champha vawi 53-na pualin Synod Hospital tan unit 33 an pe a, petute mipa 28 leh hmeichhia panga an ni. Champhaia Wesleyan Methodist Youth Fellowship-in an silver jubilee pualin District Hospital-ah unit 17 an pe a, LIKBK Ṭhalai Pawl, Lawngtlai Vengpui Bialin District Hospital-ah unit 13 an pe bawk.

Covid vaccine dose 12,11,583 pe tawh
October 29, Zirtawpni thleng khan Mizoramah Covid-19 laka invênna damdawi (vaccine) dose 12,11,583 pek chhuah a ni tawh a, dose khatna 6,97,711 leh dose hnihna 5,13,872 a ni. Vaccine dose khatna la tawh zat aṭanga la kim tawh zat chu 73.65% a tling.

Office tur enfiah
Khawzawl DC CC Lalchhuangkima leh Supply director Ramdinliani te chuan October 30, Inrinni khan Khawzawla Legal Metrology office hmun atana District Land Committee-in a ruahman tawh Far Mual chu a hmunah kalin an enfiah. Khawzawl Hermon Venga FCSCA department ram an enfiah bawk a, a hmunhma a ṭhat avangin FCSCA ramah Legal Metrology office sak ni se, an ti.

Bazar enfiah
Champhai District Sanitation Task Force hnuaia District Enforcement Team chuan October 30, Inrinni khan Champhaia chawhmeh zawrhna bazar hmunte an enfiah a, luia nungcha la puitling lo leh nungcha humhalh sa zawrhte an man. Bazar endiknaah hian vawi khat chauh hman theih polythene hman titlem tial tiala bànsan a ṭul thu leh a nghawng ṭha lote an inzirtir nghal a; khawtlang hruaitute chu zau zawka inzirtirna leh hriattirna siam turin an ngen bawk.