Covid-19 vangin mi 432 an thi tawh

October 30, Inrinni leh nimin tlai dar 5 thlengin Mizoramah Covid-19 vangin thi mi pali an thi a, October 28-a thi sorkarin Inrinnia a tarlan thar pakhat a awm bawk. Mitthi panga zinga pali chu natna dang nei tel an ni.

Nimin tlai dar 5 thleng khan Mizoramah Covid-19 vangin mi 432 an thi tawh a, October thla bikah mi 122 an thi a, hripui vanga thi an tam ber thla a ni.

October 28, Ningani zan dar 9:50 khan H Chipaw (82), Meisavaih West chu Siaha DCHC a thi a, Covid-19 vei a ni tih October 15 khan hmuh chhuah niin, October 20-ah Siaha DCHC-ah dah luh a ni a, natna dang a nei tel a nih thu sorkar thuchhuakin a tarlang.

October 30, Inrinni chawhma dar 11:45 khan Tumthliaii (74), Bualpui Ng, Lawngtlai district chu Siaha DCHC-ah a thi a, hripui vei a ni tih October 28-ah hmuh chhuah niin, natna dang a nei tel. Tlai dar 4:05 khan PC Chhingpuii (77), Siaha chu SRH-ah a thi a; hripui vei a ni tih October 7-ah hmuh niin, October 15-ah SRH-ah dah luh a ni a, natna dang nei tel a ni. Inrinni tlai vek dar 4:20 khan Rochhungi (87), Khawbél, Serchhip district pawh an inah a thi a, hripui vei a ni tih October 21-ah hmuh a ni.

Nimin zing dar 8 khan Thangbuta Pachuau (59), Chhinga Veng chu SRH-ZMC-ah a thi a; Covid-19 positive a ni tih October 25 khan hmuh chhuah niin, SRH-ah admit nghal a ni a, natna dang nei tel a nih thu sorkar thuchhuakin a tarlang.