Ni hnih chhungin hripui vei mi 1,271 hmuh chhuah a ni

Mizoramah Covid-19 vei October 29, Zir­tawpniah mi 692 leh October 30, Inrinniah mi 579 hmuh chhuah a ni a, an vaiin mi 1,271 an ni. Inrinni leh nimin khan hripui vei dam tawh mi 1,168 chhuahtir an ni a, mi pali an thi.

Covid-19 vei October 29-a hmuh chhuahte chu mipa 316 leh hmei­chhia 376 an ni a; ZMC laboratory-a hmuh 119, TrueNAT hmanga hmuh 51, RAT hmanga hmuh 518 leh FIA hmanga hmuh pali an ni. October 30-a hmuh chhuahte chu ZMC-a hmuh 208, TrueNAT hmanga hmuh 27 leh RAT hmanga hmuh 344 an ni a; mipa 273 leh hmeichhia 306 an ni.

IDSP record angin, Mizoramah Covid-19 vei 1,21,359 hmuh chhuah a ni tawh a, mipa 59,014 leh hmeichhia 62,345 an ni. Nimin tlai dar 5 thleng khan mi 1,14,414 (94.28%) chhuahtir an ni tawh a, mi 432 (0.36%) thi tawhin, enkawl mek mi 6,513 (5.36%) an awm.

October 29, Zirtawpnia Covid-19 vei hmuh thar mi 692-te chu symptom nei 367 leh nei lo 325 an ni a; tualchhunga kái 689 leh tun hnaia state pawn aṭanga rawn lut mi pathum niin, tualchhunga kai zingah hri kàina chin hriat loh 375 an awm.

October 30-a hripui vei hmuh chhuah thar mi 579-te chu symptom nei 188 leh nei lo 391 an ni a; tualchhunga kái 577 leh tun hnaia state pawn aṭanga rawn lut mi pahnih niin, tualchhunga kai zingah hri kàina chin hriat loh 220 an awm. Serchhip district-a sample 90 endikah Covid-19 positive mi 65 hmuh chhuah a ni a, 68.89% niin, district pakhata positivity rate a san ber ṭum a ni.

Kumin October thla ni 28 chhungin Mizoramah Covid-19 positive mi 26,529 hmuh chhuah a ni tawh a, chawhrualin ni tin mi 884.30 hmuh chhuah an awm ziah ang a ni a, a tlahniam hret hret zel. Kum 2011 chhiarpui aṭanga chhûtin, Mizorama Covid-19 vei hmuh tawh 1,21,359 chu mi 1,000 zelah hripui vei mi 110 an awm ang a ni a; mi 1,00,000 zela Covid-19 vangin mi 39 an thi tawh ang a ni.

Nimin khan tlai dar 5 thlengin hripui vei dam tawh mi 412 chhuahtir an ni a; Aizawl district-ah mi 292, Siaha district-ah 37, Champhai district-ah 36, Hnahthial district-ah 29, Lawngtlai district-ah 13 leh Saitual district-ah mi panga an chhuak. October 30, Inrinni khan mi 756 chhuahtir an ni bawk.

Mizorama Covid-19 vei hmuh chhuah hmasak ber chu March 24, 2020-ah hmuh chhuah a ni. IDSP tarlan danin, Covid-19 positive hmuh tawh 1,21,359 zinga mi 1,16,804 chu Mizoram chhunga kái chhâwng an ni a, mi 4,555 chu Mizoram páwn aṭanga an rawn luh hnua hmuh chhuah an ni.